Wednesday, December 30, 2015

వ్యవస్థను కాపాడిన రాముడు - డా.బి.విజయభారతి రచన - పునర్ముద్రణ ...

వ్యవస్థను కాపాడిన రాముడు 
- డా.బి.విజయభారతి 


ప్రకృతిలోని రంగులను పరిచయం చేసే పసి వయస్సులోనే -

'' ఏనుగు ఏనుగు నల్లన
ఏనుగు కొమ్ములు తెల్లన
ఏనుగు మీద రాముడు
ఎంతో చక్కని దేముడు...''

అంటూ పిల్లలకు రాముని దైవత్వాన్ని నూరిపోస్తున్న వ్యవస్థ ఇది. చిన్నప్పటి నుంచే వారికి రాముడంటే ఒక ఇష్టం - ఆరాధనా భావం ఏర్పడిపోతాయి.

మత విషయాలను ప్రశ్నించటం పాపం కాబట్టి, రామాయణం చెప్పిన విషయాలను గానీ రామాయణ సంఘటనలను గానీ ఎవరూ ప్రశ్నించరు. ఆలోచించరు. వాటిని నమ్ముతూ ఆదర్శంగా గ్రహిస్తూ వుంటారు.

రామాయణం ప్రవేశపెట్టిన సామాజిక ధర్మాల వల్ల నష్టపోతున్న వారు కూడా అంతే. అలా ఆలోచించటం నేరం అనుకుంటారు. ఈవిధంగా నష్టపోతున్న అధిక శాతం ప్రజల గురించి ఆలోచించేవారు మాత్రమే ఈ సమస్యను విశ్లేషించారు.

ఆధునిక యుగంలో మహాత్మా జోతిరావ్‌ ఫూలే, డా.బి.ఆర్‌.అంబేడ్కర్‌ లు ఈ సామాజిక వ్యవస్థ గురించి తపన పడ్డారు. అసమానతల మూలాలను అన్వేషించే క్రమంలో పురాణాల నేపథ్యాన్ని అధ్యయనం చేశారు.

సమ సమాజం కోసం, మానవతా విలువల కోసం వారు చేసిన అన్వేషణ- అందించిన సమాచారం అనంతర తరాలకు వెలుగు బాటలయ్యాయి.

ప్రాచీన కాలం నుంచీ భారతీయ వేదాంతులు - తత్వవేత్తలు, సంస్కర్తలు - రాజకీయ నాయకులు ఈ సామాజిక ధోరణులను సరిచేస్తున్నామంటూనే ఆ చిక్కుముడులను మరింత బిగిస్తూ వచ్చారు. పురాణాలు - రామాయణ మహాభారతాలు చెప్పిన ధర్మాలను అతిక్రమించే సాహసం చేయలేకపోయారు.

ఈనాటికీ రామాయణం జనంపై ప్రభావం చూపుతూనే వున్నది. ప్రజల జీవనాన్నే కాక దేశ రాజకీయాలనూ, రామాయణ కథాంశాలు నిర్దేశిస్తున్నాయి.

ఈ నేపథ్యంలో రామాయణం గురించి తెలుసుకోవలసిన అవసరం ఎంతైనా వుంది.

రామాయణం చాలా పెద్ద గ్రంథం. దాన్ని చదవటం కష్టం అనుకునే వారికి రామాయణంలోని అంశాలను పరిచయం చేయటం ఈ రచన లక్ష్యం.
(రచయిత్రి తొలిపలుకుల నుంచి)



వ్యవస్థను కాపాడిన రాముడు 

- డా.బి.విజయభారతి

270 పేజీలు; వెల రూ. 150/-

ప్రతులకు వివరాలకు:

: హైదరాబాద్‌ బుక్‌ ట్రస్ట్‌,
ప్లాట్‌ నెం. 85, బాలాజీ నగర్‌, గుడిమల్కాపూర్‌,
హైదరాబాద్‌ - 500006

ఫోన్‌ : 040 2352 1849

ఇమెయిల్‌ : hyderabadbooktrust@gmail.com

Tuesday, December 29, 2015

మనుగడ కోసం పోరాటం - ఆంధ్రప్రదేశ్‌ (తెలంగాణ) ఆదివాసులు...రచన: హైమన్‌డాఫ్‌, అనువాదం : అనంత్‌ - పునర్ముద్రణ .

మనుగడ కోసం పోరాటం - 
ఆంధ్రప్రదేశ్‌ ఆదివాసులు
-  హైమన్‌డాఫ్‌

నాలుగు కోట్ల జనాభా వున్న భారత ఆదివాసుల జీవితంలో వెలుగు నీడలను హైమన్‌డాఫ్‌ పుస్తకం కన్నా వివరంగా మరేదీ ప్రస్తావించలేదనే చెప్పాలి. ఇలాంటి పుస్తకం శాస్త్ర ఔచిత్యాన్ని గుర్తుచేయడమే కాదు మరింత పెంచుతుంది కూడా.
...      ...     ...

భారతదేశంలో, మరీ ప్రత్యేకించి ఆంధ్రప్రదేశ్‌లో (తెలంగాణాలో) మానవ పరిణామ శాస్త్రాన్ని ఆదివాసీ సముదాయాల జీవితాన్ని అధ్యయనం చేసేందుకే కాక మార్చేందుకూ ఉపయోగించిన వైతాళికుడిగా హైమన్‌డాఫ్‌ (1909-1995)ను చెప్పుకోవాలి.

ఆదివాసులను అయితే దొంగలుగా, అనాగరికులుగా, అభివృద్ధికి ఆటంకంగా చూసే వలసవాద దృక్పథానికీ, ఆదివాసులంటే 'ఇలాగే వుండాలి' అని మూస జీవితాన్ని ఆపాదించి, పరోక్షంగా వెనుకబాటుతనాన్ని ప్రతిపాదించే అధునాతనవాదుల తీవ్ర దృక్పథానికీ మధ్య స్పష్టంగా ఆదివాసుల పక్షం వహించే హైమన్‌డాఫ్‌ దృక్పథం, పరిశోధన ఈ పుస్తకం ఆమూలం కనిపిస్తుంది.
...        ...        ...

1940 నుండి 1980 వరకూ భారతీయ ఆదివాసీ సముదాయాల మధ్య నేను గడిపిన జీవితపు పరిశీలనల కదంబమే ఈ పుస్తకం. ...

లండన్‌ విశ్వ విద్యాలయంలో ఆసియా మానవ పరిణామ శాస్త్ర విభాగాధిపతిగా 1976లో పదవీ విరమణ చేసిన తరువాత నాకు క్షేత్ర పరిశోధనకు మరింత సమయం లభించింది. 1940ల్లో నేను పర్యటించిన ఆదివాసీ సముదాయాలలో చోటుచేసుకుంటున్న మార్పులను పరిశోధించేందుకే  ఆ సమయాన్ని కెటాయించాలనుకున్నాను.

ఇండియన్‌ కౌన్సిల్‌ ఆఫ్‌ సోషల్‌ సైన్స్‌ రిసెర్చ్‌ అందజేసిన ఆర్థిక సహకారంతో ఉస్మానియా విశ్వవిద్యాలయానికి చెందిన జయప్రకాశ్‌ రావు నలభై ఏళ్ల క్రితం నా పరిశోధనల్లో కేంద్రక స్థానాన్ని ఆక్రమించిన కొండరెడ్ల గురించి తను చేయదలచుకున్న పరిశోధనను పూర్తి చేయగలిగాడు. తద్వారా అతను నా పరిశోధనా కార్యక్రమంలోనూ అంతర్భాగమయ్యాడు.

నా పరిశోధనల ఫలితంగా వెలువడిన మూడు సంకలనాల్లో ప్రస్తుత పుస్తకం చివరిది. 'ది గోండ్స్‌ ఆఫ్‌ ఆంధ్రప్రదేశ్‌ : ట్రెడిషన్‌ అండ్‌ ఛేంజ్‌ ఇన్‌ యాన్‌ ఇండియన్‌ ట్రైబ్‌ (1979; ఢిల్లీ, లండన్‌), ఎ హిమాలయన్‌ ట్రైబ్‌ : ఫ్రమ్‌ క్యాటిల్‌ టు క్యాష్‌ (1980; ఢిల్లీ, బెర్కిలీ) అనేవ గతంలో విడుదలయ్యాయి.

వర్తమాన భారతీఝయ ఆదివాసుల గురించిన ఏ వాస్తవ, నిష్పాక్షిక విశే&్లషణలోనయినా ఆయా ప్రభుత్వాల పథకాల విజయాలతోపాటు, వైఫల్యాల ప్రస్తావన వుండటం తప్పనిసరి. అదేవిధంగా ఆదివాసీల ప్రస్తుత దుస్థితికి కారణమైన వారి (వాటి) గురించి విమర్శ కూడా చోటు చేసుకోవడం అనివార్యం. తన పరిశోధన ఆమూలం వివిధ ప్రభుత్వ అధికారుల సహాయ సహకారాలతో సాగిన నాలాంటి వారి రచనల్లో ఇంతటి విమర్శ వుండటం అసమంజసంగా కనిపించవచ్చు.  కానీ అవినీతి పట్ల ఉదాసీనంగా వుండటం వల్ల ఎవ్వరికైనా ఒరిగేదేమీ లేదు. పైగా ప్రభుత్వానికి మనస్తాపం కలిగించకుండా వుండేందుకు చూసీ చూడనట్లు వ్యవహరించడం మూలాన వాస్తవిక ఆదివాసీ జీవన చిత్రణే తప్పుదోవ పడుతుంది.
అందుకే ప్రస్తుత పుస్తకంలో ప్రభుత్వంపైనా, అధికార యంత్రాంగంపైనా, పథకాలపైనా మర్యాదగా చిలక పలుకులు పలకడం కన్నా నిర్ద్వంద్వంగా విమర్శించే పద్ధతినే ఎంచుకున్నాను. అంతేకానీ ఆయా ప్రభుత్వాలు అందించిన సహాయ సహకారాలపట్ల కృతఘ్నత ప్రదర్శించినట్టు కాదని భావిస్తున్నాను.

(- హైమన్‌డాఫ్‌ ముందుమాట నుంచి)


మనుగడ కోసం పోరాటం - ఆంధ్రప్రదేశ్‌ ఆదివాసులు
- హైమన్‌డాఫ్‌

ఆంగ్ల మూలం: Tribes of India : The Struggle for Survival, Christoph Von Fuirer-Haimendorf, Published in arrangement with The University of California Press Ltd.,

అనువాదం : అనంత్‌ 
185 పేజీలు ; వెల రూ. 150/-
ప్రతులకు వివరాలకు:
హైదరాబాద్‌ బుక్‌ ట్రస్ట్‌,
ప్లాట్‌ నెం. 85, బాలాజీ నగర్‌, గుడిమల్కాపూర్‌,
హైదరాబాద్‌ - 500006

ఫోన్‌ : 040 2352 1849

ఇమెయిల్‌ : hyderabadbooktrust@gmail.com


సారె తిప్పు-సాలు దున్ను ... మన కాలపు శ్రమగౌరవ పాఠాలు..ప్రొ. కంచె ఐలయ్య రచన - పునర్ముద్రణ ...


మన పిల్లలకు శ్రమ గౌరవ (డిగ్నిటీ ఆఫ్‌ లేబర్‌) 
పాఠాలు నేర్పిద్దాం



మన సమాజంలో శ్రమకు గౌరవం లేకపోవడానికి ప్రధాన కారణం కులవ్యవస్థే.
ఈ కుల వ్యవస్థ చట్రంలో ... ఒళ్లు వంచి శ్రమ చేసే ఏదైనా అమర్యాదగా, అగౌరవంగా చూపించబడ్డాయి.

శ్రమ చెయ్యటం హీనం! శ్రమ చెయ్యకుండా తినడం హుందా!!

మన విద్యా వ్యవస్థల్లో కూడా ఇదే ధోరణి ప్రతిఫలిస్తోంది.

డా.బి.ఆర్‌.అంబేడ్కర్‌ చెప్పినట్టుగా ఈ కుల వ్యవస్థ అన్నది కేవలం 'శ్రమ విభజన' కాదు.. ఇది 'శ్రామికుల విభజన'.

మన దేశంలో ఈ నిచ్చెనమెట్ల కులవ్యవస్థ శారీరక శ్రమకూ, మానసిక శ్రమకూ మధ్య స్పష్టమైన విభజన రేఖ గీచింది. దురదృష్టవశాత్తూ ఇదే ఆలోచనాధోరణి నేటి మన స్కూలు విద్యా వాధానాలను నడిపిస్తోంది. పాఠ్యప్రణాళికల్లోనూ ఇదే ధోరణి నిండి వుంది.

మన భారతీయ పిల్లలు ఉన్నత చదువులకు ఎదిగిన కొద్దీ ఫ్రాథమికమైన ఉత్పాదక శ్రమ పట్ల విముఖత పెంచుకుంటున్నారు. చదువుల్లో ఎంత ఎదిగితే వీటి పట్ల చికాకు, చిన్నచూపు అంత పెరుగుతున్నాయి. స్కూలుకు వెళ్లే ప్రతి పిల్లా, ప్రతి పిల్లవాడూ కూడా రోజువారీ పనులైన ఇల్లు ఊడ్వడం, నేల తుడవడం, గిన్నెలు తోమడం, బట్టలు ఉతకడం, చెత్తాచెదారం ఎత్తటం వంటి ఇంటి పనుల పట్ల ఏహ్యాన్నీ, అసహ్యాన్నే ప్రదర్శిస్తున్నారు. పైగా ఈ పనులన్నీ చాలా వరకూ 'అమ్మ చెయ్యాల్సిన' పనులుగా భావిస్తున్నారు.  లేదూ కాస్త కలిగిన కుటుంబానికి చెందిన వాళ్లయితే ఇవన్నీ 'పని మనిషి' చూసుకోవాల్సిన చెత్తపనులని భావిస్తున్నారు.

చిత్రమేమిటంటే, ఆ 'పనిమనిషి' కూడా చాలాచోట్ల  'కింది కులాలకు' చెరదిన  మహిళే అయ్యుంటుంది. మొత్తానికి ఇంటి పని చేసే ఏ మహిళకైనా కూడా ... కుమ్మరి, మంగలి, చాకలి వంటి కింది కులాల స్థాయినే ఇస్తున్నారు.

ఇటువంటి పనులకు సరైన గౌసవమే కాదు, గౌరవప్రదమైన వేతనం కూడా ఉండదు. కాబట్టి శ్రమ గౌరవం లేకపోవటం, శ్రమను చులకనగా చూడటమన్నది కులం, జెండర్‌లు రెంటితోనూ ముడిపడి వుందని గుర్తించాలి.

శ్రమను నీచంగా చూసే ఈ ఆలోచనలన్నీ కూడా పిల్లలకు ఇళ్లలోనూ, స్కూళ్లలోనూ, శతాబ్దాలుగా పరంపరగా వస్తున్న సాంస్కృతిక, సామాజిక విలువల వ్యవస్థల ద్వారానూ చాలా తేలికగా ఒంటబడుతున్నాయి.

ఈ పరిస్థితిని చక్కదిద్దాలంటే... శ్రమను గౌరవించటమన్నది మన పిల్లలకు స్కూలులో బోధనాంశాల్లో భాగంగానూ, ఇంట్లోనూ నేర్పించాల్సిన అవసరం వుంది.   ...

రేపటి పౌరులకు శ్రమ గౌరవాన్ని నేర్పించటానికీ, హేతుబద్ధమైన, శాస్త్రీయమైన, ప్రజాస్వామికమైన భారతదేశాన్ని నిర్మిచటానికీ ఈ పుస్తకం ఎంతో దోహదపడుతుందని ఆశిస్తున్నాను. (రచయిత ముందుమాట నుంచి)



సారె తిప్పు-సాలు దున్ను ... 
మన కాలపు శ్రమగౌరవ పాఠాలు

- కంచె ఐలయ్య 

బొమ్మలు : దుర్గాబాయ్‌ వ్యామ్‌
తెలుగు : 'చంద్రిక'

108 పేజీలు, వెల రూ. 140/-

ప్రతులకు వివరాలకు:
హైదరాబాద్‌ బుక్‌ ట్రస్ట్‌,
ప్లాట్‌ నెం. 85, బాలాజీ నగర్‌, గుడిమల్కాపూర్‌,
హైదరాబాద్‌ - 500006

ఫోన్‌ : 040 2352 1849

ఇమెయిల్‌ : hyderabadbooktrust@gmail.com









 

Thursday, December 24, 2015

బాబాసాహెబ్‌ అంబేడ్కర్‌ - బి.విజయభారతి రచన - పన్నెండో ముద్రణ అదనపు సమాచారంతో...

బాబాసాహెబ్‌ అంబేడ్కర్‌ 
- బి. విజయభారతి రచన 

డాక్టర్‌ విజయభారతి ఈ పుస్తకంలో డాక్టర్‌ అంబేడ్కర్‌ దళిత జనోద్ధరణ కోసం చేసిన కృషిని, పోరాటాలను చక్కని శైలిలో వివరించారు. అంబేడ్కర్‌ జీవితమే కాకుండా అప్పటి సాంఘిక, రాజకీయ స్థితిగతుల్ని బాగా అధ్యయనం చేసి రచన సాగించారు. ఈ పుస్తకం ప్రస్తుత మూఢ విశ్వాసాలతో నిండివున్న సమాజంపై కులతత్వం, మతతత్వం, అనైక్యతలపై 'డైనమైట్‌' వంటిది. సాంఘిక విప్లవానికి ఈ పుస్తకం దోహదపడుతుంది.
-- డాక్టర్‌ ఎం. ఏబెల్‌
(మాజీ వైస్‌ ఛాన్స్‌లర్‌, శ్రీకృష్ణదేవరాయ విశ్వవిద్యాలయం)

డాక్టర్‌ విజయభారతిగారి ఈ పుస్తకం 'టైంబాంబ్‌ ' లాంటిది. కులతత్వంతో కూడిన సమాజ వ్యవస్థను ఇది బ్రద్దలు చేస్తుంది. ఈ పుస్తకం వల్ల కొందరి హృదయాలు బాధపడ్డా, మరికొందరి హృదయాలు సంస్కరింపబడతాయి.
-- జస్టిస్‌ కె. పున్నయ్య
............................

ఈ పుస్తకం నుంచి ఒక అధ్యాయం సంక్షిప్తంగా...

1954 డిసెంబర్‌లో ప్రపంచ బౌద్ధ మహాసభలు రంగూన్‌లో జరిగాయి. అంబేడ్కర్‌ ఆరోగ్యం అంత బాగుండలేదు. అయినా రంగూన్‌ వెళ్లాడు. భార్య, ఒక సేవకుడు వెంట వెళ్లారు. బౌద్ధ ధర్మ సంబంధమైన ఆధ్యాత్మిక- మానసిక భావ సంచలనం ఆయనను విచలితున్ని చేసింది. ఉపన్యసించేటప్పుడు చెక్కిళ్లమీద కన్నీరు జాలువారింది. అయినా నిగ్రహించుకుని భావశబలతతో ఉపన్యసించాడు.

... అంబేడ్కర్‌ బౌద్ధ మతాన్ని స్వీకరించబోతున్నాడన్న వార్త బౌద్ధులను ఆనందపరచింది. నిమ్న జాతులంతా బౌద్ధం స్వీకరిస్తే భారతదేశపు రూపురేఖలే మారిపోగలవని వారు భావించారు.

... 1956 పూర్వార్థానికి బౌద్ధ ధర్మాన్ని గురించి అంబేడ్కర్‌ మొదలుపెట్టిన పుస్తకం సుమారుగా పూర్తి కావచ్చింది. ... చివరికి ఆ గ్రంధం ''ద బుద్ధా అండ్‌ హిజ్‌ గాస్పెల్‌'' అనే పేరుతో ముద్రితమైంది. ...చివరలో పేరు మార్చాడు. 1956 ఫిబ్రవరిలో 'దేరీజ్‌ నో గాడ్‌', 'దేరీజ్‌ నో సోల్‌ ' అనే మరో రెండు అధ్యాయాలు చేర్చాడు.

బౌద్ధమతాన్ని గురించిన ఆయన అభిప్రాయాలను లండన్‌ రేడియో 1956 మే  నెలలో ప్రసారం చేసింది. మానవ జీవితానికి ముఖ్యంగా కావలసిన ప్రజ్ఞ, కరుణ, సమత అనే మూడు ప్రధానాంశాలను బోధిస్తున్న మతం ఇది ఒక్కటే అని అంబేడ్కర్‌ చెప్పాడు.

మార్క్స్‌ సిద్ధాంతాలకు, కమ్యూనిజానికి బౌద్ధమతమే చక్కని సమాధానమిస్తుందన్నాడు. 'కమ్యూనిజాన్ని దిగుమతి చేసుకున్న బౌద్ధ దేశాలకు కమ్యూనిజం అంటే నిజమైన అవగాహన లేదు.  బౌద్ధ ధర్మంతో కూడిన కమ్యూనిజం శాంతియుత విప్లవాన్ని తెస్తుంది. నేటి కమ్యూనిస్టు దేశాలలో రక్తపాతం లేకుండా మార్పు రావడంలేదు' అన్నాడు అంబేడ్కర్‌.

ఆసియా దేశాలు త్వరపడి రష్యా మార్గాన్ని అనుసరించరాదనీ, బుద్ధుని సిద్దాంతాలకు రాజకీయ రూపం ఇస్తే అదే మానవాళి మనుగడకు చక్కని మార్గమనీ చెప్పాడు. వాయిస్‌ ఆఫ్‌ అమెరికాకు ఇచ్చిన ప్రసంగంలో ప్రజాస్వామ్య ప్రగతిని గూర్చి మాట్లాడాడు. పార్లమెంటరీ ప్రభుత్వంలో గానీ, మరేరకమైన ప్రభుత్వంలో గానీ ప్రజాస్వామ్య పరిరక్షణకు సహజీవన దృక్పథం అవసరమనీ, హిందూదేశ సమాజంలో కులం అనేక విచ్ఛేదాలను తెచ్చిపెడుతున్నదనీ వివరించాడు.

... (1956 అక్టోబర్‌ 14న) ఉదయం 9 గంటల 15 నిమిషాలకు అంబేడ్కర్‌ (నాగపూర్‌లో వాక్సీన్‌ ఇన్‌స్టిట్యూట్‌ వద్ద 14 ఎకరాల విస్తీర్ణం గల మైదానంలో లక్షలాది అభిమానుల మధ్య) వేదిక నలంకరించాడు. తెల్లని సిల్కు పంచె, తెల్లని కోటు ధరించాడు. డి వలీసిన్హా, సంఘరత్న తీర్థ, తిస్సా తీర్థ, పన్నానంద తీర్థలు వేదిక మీద వున్నారు. అంబేడ్కర్‌ను స్తుతించే ఒక మరాఠీ గీతంతో కార్యక్రమం ఆరంభమైంది. అంబేడ్కర్‌ తండ్రికి శ్రద్ధాంజలి సూచకంగా ఒక నిమిషం మౌనం పాటించాక కుశీ నగరానికి చెందిన వృద్ధ భిక్షు మహాస్థవిర చంద్రమణి తన నలుగురు శిష్యులతో అంబేడ్కర్‌ దంపతులకు దీక్షా విధిని నిర్వహించాడు. ...

... ''అసమానతకు, దాస్యానికి నిలయమైన నా తాత తండ్రుల (హైందవ) ధర్మాన్ని త్యజించి నేనీనాడు తిరిగి జన్మించాను'' అన్నాడు అంబేడ్కర్‌. ఆయనకు అవతారాల మీద నమ్మకం లేదు. బుద్ధుడు విష్ణువు అవతారమని చెప్పే వాదాన్ని ఆయన ఖండించాడు.

''నేనిక ఏ హిందూ దేవుణ్నీ, దేవతనూ పూజించను. శ్రాద్ధ కర్మలు  చేయను. బుద్ధుని అష్టాంగమార్గాన్ని అనుసరిస్తాను. బౌద్ధమే నిజమైన ధర్మం.  త్రిశరణాల ఆధారంతో జీవితాన్ని కొనసాగిస్తాను'' అని దీక్ష వహించాడు.

... తాను దీక్ష గ్రహించడం పూర్తయినాక, బౌద్ధమతంలో చేరదల్చుకున్న వారిని లేచి నిలబడమని అంబేడ్కర్‌ కోరాడు. సభామండపంలో ఉన్న యావన్మందీ లేచి నిల్చున్నారు....
..........

బాబాసాహెబ్‌ అంబేడ్కర్‌ 
- బి.విజయభారతి 

292 పేజీలు; వెల: రూ.120/-

మొదటి ముద్రణ : 1982
పునర్ముద్రణ : 1986, 1990, 1992, 1999, 2005, 2008, 2009, 2010, 2012, 2013, 2015

ప్రతులకు వివరాలకు:
: హైదరాబాద్‌ బుక్‌ ట్రస్ట్‌,
ప్లాట్‌ నెం. 85, బాలాజీ నగర్‌, గుడిమల్కాపూర్‌,
హైదరాబాద్‌ - 500006
ఫోన్‌ : 040 2352 1849
ఇమెయిల్‌ : hyderabadbooktrust@gmail.com


Monday, November 23, 2015

ఆనంద్ బుక్స్ డాట్ కాం లో పది శాతం రిబేట్ తో హెచ్ బీ టీ పుస్తకాల అమ్మకం


ఆనంద్ బుక్స్ డాట్ కాం వారు హైదరాబాద్ బుక్ ట్రస్ట్ ప్రచురించిన పుస్తకాలను 10 శాతం తగ్గింపు ధరతో
అందిస్తున్నారని తెలియజేయడానికి ఆనందిస్తున్నాం.
మరిన్ని వివరాల కోసం వారి వెబ్ సైట్ ను సందర్శించండి

http://www.anandbooks.com/search?tag=Hyderabad%20Book%20Trust

ఆనంద్ బుక్స్ వారిని ఈ ఫోన్ నెంబర్ల లో కూడా సంప్రదించవచ్చు:

 0863-2323588,
 9490952588



Saturday, October 31, 2015

కుల నిర్మూలన - బి.ఆర్‌.అంబేడ్కర్‌ - అనువాదం: బోయి భీమన్న - పునర్ముద్రణ .

కుల నిర్మూలన - బి.ఆర్‌.అంబేడ్కర్‌ - అనువాదం: బోయి భీమన్న

''ఈ రోజుల్లో కూడా (1936లో) కుల వ్యవస్థను సమర్థించే వాళ్లుండడం ఒక దురుదృష్టం. సమర్థించడం ఎన్నో రకాలు. అందులో ఒకటి - కుల వ్యవస్థను శ్రమ విభజన పద్ధతితో పోల్చడం. అన్ని నాగరిక సమజాలలోనూ శ్రమ విభజన పద్ధతి అత్యావశ్యకంగా వుంటున్నది కనుక, అదే రకమైన కుల వ్యవస్థ మన సమాజంలో వుండటం తప్పుకాదని ఈ వాదాన్ని సమర్థించేవాళ్లు అంటున్నారు. ఈ వాదన వాస్తవ విరుద్ధం. కుల వ్యవస్థ శ్రమ విభజనే కాదు. అది శ్రామికుల విభజన కూడా. నాగరిక సమాజానికి శ్రమ విభజన అవసరమే. అయితే శ్రమ విభజనతో పాటు శ్రామికుల విభజన జరగడం- వారి మధ్య అసహజమైన, దాటడానికి వీలులేని అడ్డుగోడలు కట్టబడటం ఏ నాగరిక సమాజంలోనూ లేదు. మరొక విషయం ఏమిటంటే - భారతదేశంలోని ఈ కార్మిక విభజన స్వచ్ఛందమైనది కాదు. వారి వారి సహజ స్వభావాలను, అభిరుచులను బట్టి చేయబడ్డ విభజన కాదు.''
....
''... ప్రప్రథమంగా మనం గుర్తించవలసింది ఏమిటంటే అసలు హిందూ సమాజమే ఒక పుక్కిటి పురాణం అని. ''హిందూ'' అనే పదమే ఒక విదేశీ పదం. మహమ్మదీయులు తమ ప్రత్యేకతను తెలియజేసుకునేందుకు ఈ దేశ ప్రజలకు ''హిందువులు'' అని పేరు పెట్టారు. మహమ్మదీయుల దండయాత్రలకు పూర్వం ఏ సంస్కృత గ్రంథంలోనూ ''హిందూ'' అనే శబ్దం కనిపించదు. ఈ దేశ ప్రజలకు తామందతా ఒక జాతి ప్రజలమనే భావమే లేదు. హిందూ సమాజం అనేది ఏదీ లేదు. ఉన్నది ఒక్కటే. అది కొన్ని కులాల సముదాయం. ప్రతి కులానికీ తాము బ్రతకడం ఒక్కటే లక్ష్యం, పరమార్థం. ఈ కులాలు దేనికదే. అవి అన్నీ కలిసి ఒక సమాఖ్యగా అయినా ఏర్పడలేదు. ఎప్పుడైనా హిందూ- ముస్లిం కొట్లాట  వంటిది సంభవించినప్పుడు తప్ప, ఏ కులానికీ మరో కులంతో అనుబంధం వున్నట్టు కనిపించదు. ప్రతి కులం తక్కిన కులాల నుండి దూరంగా వుండడానికి, తన ప్రత్యేకతను నిలబెట్టుకోడానికి మాత్రమే ప్రయత్నిస్తుంది.''
...
''ప్రపంచంలో అన్ని దేశాలలో సాంఘిక విప్లవాలు జరిగాయి. భారతదేశంలో ఎందుకు జరగలేదు అన్నది నన్ను నిరంతరం వేధించే ప్రశ్న. బహుశ అందుకు ఒకే ఒకటి కారణమై వుండవచ్చు. అది- హిందువులలోని దిగువ తరగతుల ప్రజలు పనికిమాలిన చాతుర్వర్ణ వ్యవస్థ కారణంగా అణిచిపెట్టబడి, ప్రత్యక్ష చర్యకు పూర్తిగా పనికిరాకుండా చేయబడటం.''
...
''భారతదేశంలో అందరూ ఈ కుల వ్యవస్థకు బానిసలే. అయితే, ఈ బానిసలందరూ ఒకే స్థాయికి చెందినవాళ్లు కాదు. ఆర్థిక విప్లవం తీసుకురావడం కోసం శ్రామిక జనాన్ని రెచ్చగొట్టేందుకు మార్క్స్‌ మహాశయుడు ''పోరాడితే మీకు పోయేదేమీ లేదు - బానిస సంకెళ్లు తప్ప'' అని ఉద్బోధించాడు. కానీ, హిందువులలోని వివిధ కులాల ప్రజలను కుల వ్యవస్థకు వ్యతిరేకంగా ప్రేరేపించడానికి మార్క్స్‌ మహాశయుడి నినాదం ఏవిధంగానూ పనికిరాదు. ఎందుకంటే మత సాంఘిక హోదాలు అంత చాకచక్యంతో, విచిత్రంగా ఏర్పాటు చేయబడ్డాయి.''
...
'' కుల నిర్మూలన చాలా మహత్తరమైన పని. చాలా వరకు అసాధ్యమైన పని కూడా కావచ్చు. హిందువులు తమ సామాజిక వ్యవస్థను పరమ పవిత్రంగా భావిస్తారు. కులానికి దైవ ప్రాతిపదికను ఆపాదిస్తారు.  అందువల్ల కులాన్ని నిర్మూలించాలంటే దానికి ఆధారంగా కల్పించబడ్డ దైవికతను, పవిత్రతను ముందు నిర్మూలించవలసి వుంది. అంటే శాస్త్రాల యొక్క, వేదాల యొక్క అధికారాన్ని, పవిత్రతను ముందు నిర్మూలించవలసి వుందన్నమాట.''
...
''అత్త పెట్టదు అడుక్కు తిననివ్వదు'' అన్న సామెతలాగా హిందూ నాయకులు కులాన్ని వదలరు. అంటరానితనాన్ని నిర్మూలించరు. దళితుల్ని మతం మారనివ్వరు. ఇంత అన్యాయం మరెక్కడైనా వుంటుందా?"
...
కుల నిర్మూలన
- డా.బి.ఆర్‌. అంబేడ్కర్‌
తెలుగు అనువాదం: బోయి భీమన్న

మొదటి ముద్రణ: 1969
మలిముద్రణలు: 1969, 1981, 1990, 1992, 1994, 1998, 2001, 2006, 2015

103 పేజీలు, వెల: రూ.30
ప్రతులకు, వివరాలకు:

హైదరాబాద్‌ బుక్‌ ట్రస్ట్‌,
ప్లాట్‌ నెం. 85, బాలాజీ నగర్‌
గుడిమల్కాపూర్‌, హైదరాబాద్‌ - 500 006.

ఫోన్‌ : 23521849
Email ID: hyderabadbooktrust@gmail.com

.


Tuesday, October 6, 2015

హైదరాబాద్ బుక్ ట్రస్ట్ కు "లతా రాజా సేవా శిరోమణి" అవార్డ్ !

హైదరాబాద్ బుక్ ట్రస్ట్ కు "లతా రాజా సేవా శిరోమణి" అవార్డ్ !

తెలుగు సాహిత్యానికి హైదరాబాద్ బుక్ ట్రస్ట్ చేస్తున్న సేవకు గుర్తింపుగా లతా రాజా ఫౌండేషన్ వారు
సేవా శిరోమణి అవార్డుకు ఎంపిక చేసారు.

8 అక్టోబర్ 2015 గురువారం సాయంత్రం 6 గంటలకు రవీంద్ర భారతి లో జరిగే ఒక కార్యక్రమంలో
ఈ అవార్డు ను ప్రదానం చేస్తారు.  ప్రముఖ భరతనాట్యం డాన్సర్ శ్రీమతి రాజేశ్వరి సాయినాథ్ కు
కూడా అదేవేదికపై "లతా రాజా సాంస్కృతిక శిరోమణి" అవార్డును ప్రదానం చేయనున్నారు.

సభా కార్యక్రమ వివరాలు దిగువ ఆహ్వాన పత్రికలో చూడవచ్చు.
అందరూ ఆహ్వానితులే



Wednesday, September 30, 2015

బాలగోపాల్‌ సైన్స్ వ్యాసాలు


బాలగోపాల్‌
 సైన్స్ వ్యాసాలు

'వాడు లెక్కల మనిషిరా.
లెక్క ప్రకారమే నడుచుకుంటాడు' అని ఒకసారి కాళోజీ అన్నారు బాలగోపాల్‌ గురించి.

లెక్కల్లో బాలగోపాల్‌ చేసిన పి.హెచ్‌.డి. గుర్తుండడం వల్లే ఆయన బహుశా అలా అని ఉంటారు.

అయితే ఎన్నో విషయాల మీద వందలాది వ్యాసాలు రాసిన బాలగోపాల్‌ ఎందుచేతో తను చదువుకున్న గణితం మీద (ఇంగ్లీషులో అకడమిక్‌ వ్యాసాలు ఎన్నో రాసినప్పటికీ) మాత్రం తెలుగులో దాదాపుగా ఏమీ రాయలేదు. ఒకే ఒక చిన్న వ్యాసం, అదీ పుస్తక సమీక్షగా మాత్రమే రాశారు.

అలాగే  సైన్స్  గురించి రాసింది కూడా తక్కువే. మూడే వ్యాసాలు. అందులో ఒకటి ఉపన్యాసం, ఒకటి సమీక్ష, ఒకటి కొ.కు.  సైన్స్  వ్యాసాల పుస్తకానికి రాసిన ముందుమాట. అన్నీ కలిపి 30 పేజీలకు మించని నాలుగే వ్యాసాలైనా వాటిలోనే బాలగోపాల్‌ అనేక చర్చించదగ్గ ఆలోచనాత్మక విషయాలను చెప్పారు.
ముఖ్యంగా -
మన దేశంలో వైజ్ఞానిక శాస్త్రం పురోగమించకపోవడానికి వర్ణ వ్యవస్థ ఎలా ఆటంకమైందో పలు ఉదాహరణలతో వివరించారు. ఆయన మాటల్లోనే చెప్పాలంటే - 'మన దేశ 'ఆధునిక' వైజ్ఞానిక సంప్రదాయం మధ్యయుగాల బ్రాహ్మణ సంప్రదాయానికి కొనసాగింపు మాత్రమే' నన్నారు. 'సైంటిస్టులలో అధిక శాతం కులంరీత్యానూ, ఆలోచనల్లోనూ బ్రాహ్మణులు కాగా, కులంరీత్యా బ్రాహ్మణులు కానివారు కూడా ఆలోచనలలో బ్రాహ్మణులే' నన్నారు. 'విజ్ఞానానికి భౌతిక పునాది వుందనీ, ఆ విజ్ఞానాన్ని మానవులు సామాజిక ఆచరణలో భాగంగా సంపాదించుకున్నారనీ బ్రాహ్మణ సంప్రదాయం ఒప్పుకోదు' అన్నారు.

 సైన్స్ ను కూడా ఒక భావజాలంగా మార్చే ప్రయత్నం జరుగుతోందని చెపుతూ  'దీని ప్రభావం తమను తాము సామ్రాజ్యవాద వ్యతిరేక అభ్యుదయవాదులుగా భావించుకునే వారి మీద కూడా బలంగా ఉంద'ని ఎత్తి చూపారు. ' సైన్స్ ను ఇటు వంటి వ్యక్తులు కూడా సామాజిక ఆచరణకూ, వర్గ ప్రయోజనాలకూ అతీతమైన పరమ సత్యంగా - తెలిసో తెలియకో - భావించబట్టే అణు విద్యుత్‌ కేంద్రాలు మానవ మనుగడకు ప్రమాదం అని తెలిసినా వ్యతిరేకించడానికి భయపడతార'ని అన్నారు. ' సైన్స్  అనే దాని గర్భంలో వున్న నిజమైన  సైన్స్ ను వెతికి పట్టుకోవడానికి... బ్రాహ్మణ భావజాలంతోనూ తలపడాలి, సామ్రాజ్యవాదపు 'సైన్స్‌' అనే భావజాలం తోనూ తలపడాలి' అని సూచించారు.



బాలగోపాల్‌
సైన్స్ వ్యాసాలు

ధర : రూ. 25/- 
తొలి ముద్రణ:సెప్టెంబర్‌ 2015

ప్రతులకు, వివరాలకు:

హైదరాబాద్‌ బుక్‌ ట్రస్ట్‌,
ప్లాట్‌ నెం. 85, బాలాజీ నగర్‌
గుడిమల్కాపూర్‌, హైదరాబాద్‌ - 500 006.

ఫోన్‌ : 23521849
Email ID: hyderabadbooktrust@gmail.com

Sunday, September 20, 2015

'1984 and 2002 riots will get repeated : Asaduddin Owaisi, Member of Parliament



Sep 20 2015 : The Times of India (Hyderabad)

'84, 2002 will get repeated: Owaisi
Hyderabad:
TIMES NEWS NETWORK


MIM president Asaduddin Owaisi on Saturday feared that major riots would rock the country as what happened in “1984 and 2002“.

Owaisi was referring to the anti-Sikh riots which shook the country in 1984 and the 2002 postGodhra riots which claimed hundreds of lives, most of them Muslim, in Gujarat, at a time when current Prime Minister served as state's CM. What has happened in'84 and 2002 can happen again because of pressure from the media and NGOs.

He was speaking at the launch of the Dilli 1984 Nundi Gujarat 2002 Varaku: Vyavasthala Vaiphalyam pao Panchnama at La Makaan. Emphasizing that the police must be independent of the executive, Owaisi said that no amount of media pressure or criticism from non-governmental organisations could prevent such incidents from happening.


“But believe me this can happen again. Unless the police force is detached from the executive and is made independent and accountable, believe me it is going to happen again. It takes a small incident to fire up a whole issue and it is very unfortunate,“ he said.

Courtesy : The Times of India Hyderabad, 20 Sept 2015

----------------------------------------------------------------------------------------------------------------------


Courtesy : Deccan Chronicle, 20 Sept 2015

--------------------------------------------------------------------------------------------------------------------



ఆనాటి మత కలహాలు పునరావృత మయ్యే పరిస్థితులు - ఎంపి అసదుద్దీన్ ధ్వజం

నిన్న (19-09-2015) లామకాన్ లో జరిగిన
"1984 దిల్లీ నుండి 2002 గుజరాత్ వరకు - వ్యవస్థల వైఫల్యం పై పంచనామా "
పుస్తకావిష్కరణ సభ గురించి
ఈనాడు, ఆంధ్ర జ్యోతి, సాక్షి, నమస్తే తెలంగాణ  పత్రికలలో వచ్చిన వార్తల కత్తిరింపులు:










ఈనాడు, ఆంధ్రజ్యోతి, సాక్షి, నమస్తే తెలంగాణ  పత్రికల సౌజన్యంతో 








Wednesday, September 16, 2015

1984 దిల్లీ నుండి 2002 గుజరాత్‌ వరకు... వ్యవస్థల వైఫల్యంపై పంచనామా రచన : మనోజ్‌ మిట్ట & హెచ్‌.ఎస్‌ . ఫూల్కా

1984 దిల్లీ నుండి 2002 గుజరాత్‌ వరకు... వ్యవస్థల వైఫల్యంపై పంచనామా
రచన : మనోజ్‌  మిట్ట  &  హెచ్‌.ఎస్‌ . ఫూల్కా


1984లో ఇందిరాగాంధీ హత్యానంతరం దేశ రాజధాని దిల్లీలో సిక్కులపై జరిగిన జాతి హననకాండలో దాదాపు మూడువేల మంది బలయ్యారు. 2002లో గోద్రా సంఘటన అనంతరం గుజరాత్‌లో ముస్లింలపై జరిగిన జాతి హననకాండలో దాదాపు రెండువేల మంది బలయ్యారు. భారతదేశ చరిత్రలోనే అత్యంత కిరాతకమైన మారణహోమాలివి.

బాధితులకు కనీస న్యాయాన్ని అందించడంలో, నేరస్తులకు శిక్షలు విధించడంలో, భవిష్యత్తులో ఇలాంటి అమానుష సంఘటనలు జరగవని ప్రజలకు భరోసా కల్పించడంలో అన్ని వ్యవస్థలూ దారుణంగా విఫలమయ్యాయి.

ఆస్తినీ, ఆప్తులనూ కోల్పోయిన బాధితులు తలవంచుకుని భయం భయంగా బతుకీడుస్తుంటే ... ఈ దారుణాలకు పాల్పడిన నేరస్తులూ, గూండాలూ, రాజకీయనాయకులూ తాము ఏం చేసినా చెల్లుతుందనే ధీమాతో బోరవిరుచుకుని తిరుగుతున్నారు.

దిల్లీ అల్లర్లను ప్రస్తావిస్తూ అప్పటి ప్రధానమంత్రి రాజీవ్‌ గాంధీ ''ఒక మహావృక్షం కూలిపోయినప్పుడు దాని చుట్టూ వున్న భూమి కంపించడం సహజమే'' అని వ్యాఖ్యానించారు.

గుజరాత్‌ అల్లర్లను దృష్టిలో పెట్టుకుని అప్పటి ముఖ్యమంత్రి నరేంద్రమోదీ ''ప్రతి చర్యకూ ప్రతి చర్య వుంటుంది'' అని వ్యాఖ్యానించారు.

దిల్లీ అల్లర్లను విచారించేందుకు నియమించబడ్డ జస్టిస్‌ మిశ్రా కమిషన్‌ అతకతవకగా వ్యవహరించి ఘోరంగా విఫలమయింది. ఇక గుజరాత్‌ విషయంలో ప్రత్యేక దర్యాప్తు సంస్థ మోదీకి ''క్లీన్‌ చిట్‌''ను ప్రసాదించింది.

ఈ రెండు మారణహోమాలు జరిగి సంవత్సరాలు గడిచినా వాటి ప్రాసంగికత మాత్రం నేటికీ చెక్కుచెదరలేదు. పైగా మొన్న దిల్లీ, నిన్న గుజరాత్‌ ... రేపు ఎక్కడో అని భయపడేలా మతోన్మాదం రోజురోజుకూ మరింతగా విజృంభిస్తోంది. చాపకింద నీరులా అన్ని వ్యవస్థలకూ విస్తరిస్తోంది. ఎప్పుడు ఎక్కడ ఈ అగ్నిపర్వతం పేలుతుందో, మరెంతమందిని అది బలితీసుకుంటుందో అన్న ఆందోళనను కలిగిస్తోంది.

పత్రికా రచయిత మనోజ్‌మిట్టా, సీనియర్‌ న్యాయవాది హెచ్‌.ఎస్‌.ఫూల్కా దిల్లీ ఊచకోత బాధితులకు న్యాయం జరిగేలా ఏళ్లతరబడి తమ శక్తిమేరా  ప్రయత్నించడమే కాకుండా - ఎంతో నిబద్ధతతో ఈ రెండు మారణహోమాలపై పరిశోధనలు జరిపి ''వెన్‌ ఎ ట్రీ షుక్‌ దిల్లీ : ద 1984 కార్నేజ్‌ అండ్‌ ఇట్స్‌ ఆఫ్టర్‌మాత్‌'' (రోలీ బుక్స్‌); ''ది ఫిక్షన్‌ ఆఫ్‌ ఫాక్ట్‌ ఫైండింగ్‌ : మోదీ అండ్‌ గోద్రా'' (హార్పర్‌ కాలిన్స్‌) అనే పుస్తకాలను వెలువరించారు.

హైదరాబాద్‌ బుక్‌ ట్రస్ట్‌ ఆ రెండు పుస్తకాలనూ ''1984 దిల్లీ నుండి 2002 గుజరాత్‌ వరకు : వ్యవస్థల వైఫల్యాలపై పంచనామా'' పేరుతో ఒకే పుస్తకంగా తెలుగు పాఠకులకు అందిస్తోంది.

మంచి భవిష్యత్తును ఆకాంక్షించే, లౌకికవాదాన్నీ మానవ విలువలనీ  కోరుకునే ప్రతి ఒక్కరికీ ఈ పుస్తకం ఎంతో ఉపయోగపడుతుంది.
..............

పై రెండు పుస్తకాలపై వివిధ పత్రికల్లో వచ్చిన కొన్ని సమీక్షలు:

సిక్కులకు వ్యతిరేకంగా జరిగిన అల్లర్లలో కాంగ్రెస్‌ పార్టీ కౌన్సెలర్లు, పార్లమెంట్‌ సభ్యులు, కేంద్ర మంత్రులు ఏవిధంగా పాలుపంచుకున్నారో మనోజ్‌ మిట్ట, హెచ్‌ఎస్‌ ఫూల్కా ఈ పుస్తకంలో చాలా స్పష్టంగా వివరించారు. ఆ సమయంలో కొందరు కాంగ్రెస్‌ వాదులు గుడ్లప్పగించి చూస్తుంటే, మరికొందరు వేటగాళ్లలాంటి గుంపులకు స్వయంగా నాయకత్వం వహించారు. ఇంకొందరు పోలీసులకు ఏ చర్యలూ తీసుకోవద్దంటూ ఆదేశాలను జారీ చేశారు.
- అశీష్‌ నందీ, ఔట్‌లుక్‌

ఈ పుస్తకాన్ని గొప్ప నిజాయితీతో రాశారు. ఎక్కడా రాజీపడకుండా కఠిన వార్తలను నివేదించే విలేఖరి దృక్పథంతో రాశారు. తిరుగులేని విస్పష్టమైన దృక్పథం అది. ఎవరినీ వదలకుండా, ఎంతటివారి పేరును ప్రస్తావించడానికైనా  వెనుకాడకుండా, కుండబద్దలు కొట్టినట్టు వారి బండారాన్ని బట్టబయలు చేసే దృక్పథం.  రంగుల మీడియా రాజ్యమేలుతున్న ఈరోజుల్లో దురదృష్టవశాత్తూ ఇలాంటి విలక్షణమైన దృక్పథం చాలా అరుదుగా కనిపిస్తుంది.
- రామచంద్ర గుహ, ది టెలిగ్రాఫ్‌

ఇప్పటికీ మనకు అత్యంత అవమానకరంగా అనిపించే దారుణాన్ని గుర్తుచేసుకునేందుకు మీరు ఈ పుస్తకాన్ని చదవాలి. ఎన్నో దారుణాలలో ఇది మొట్టమొదటిది. దిల్లీ తరువాత ముంబైలో, గుజరాత్‌లో ఇలాంటి దారుణాలే జరిగాయి. రేపు ఎక్కడ జరుగుతాయో ఎవరికి తెలుసు?
- సాగరిక ఘోష్‌, బిబ్లియో

స్వతంత్ర భారతదేశంలో ప్రభుత్వ ప్రమేయంతో జరిగిన ఒక గగుర్పొడిచే మారణహోమం గురించిన వాస్తవాలను ఈ పుస్తక రచయితలు ఎంతో శ్రమించి సమగ్రంగా ఆవిష్కరించారు. తమ రాజకీయ యజమానుల ఆదేశాలకు అనుగుణంగా దిల్లీ పోలీసులు పోషించిన అభిశంశనీయమైన పాత్రను ఈ పుస్తకం తూర్పారబట్టి ఎంతో సార్వజనిక సేవచేసింది. 
- లలిత పణికర్‌, హిందుస్థాన్‌ టైమ్స్‌.

న్యాయస్థానంచేత నిర్దోషులుగా విడుదల చేయబడ్డవారు పునీతులని అనుకోవాల్సినపనిలేదని మనోజ్‌ మిట్టా పుస్తకం మనకు మరోసారి గుర్తుచేస్తుంది... ముఖ్యంగా భారీ పరస్పర విరుద్ధ సాక్ష్యాల మధ్య! అందుకే వాటిని ప్రశ్నించడం మన కర్తవ్యం అని ప్రబోధిస్తుంది.
- శివ విశ్వనాధన్‌, దక్కన్‌ క్రానికల్

గుజరాత్‌ అల్లర్లలో తన పాత్ర గురించి నరేంద్ర మోదీని గనక సరైన ప్రశ్నలు అడిగివుంటే ఇవాళ ఆయన బోనులో వుండేవారు... ప్రధాన మంత్రి పదవికి ఆయనను వ్యతిరేకించేవారు.
- మను జోసెఫ్‌, ద న్యూయార్క్‌ టైమ్స్‌

మనోజ్‌ మిట్ట రాసిన ఉత్కంఠభరితమైన పరిశోధనాత్మక పుస్తకం ''ద ఫిక్షన్‌ ఆఫ్‌ ఫాక్ట్‌ ఫైండింగ్‌ - మోదీ అండ్‌ గోధ్రా'' చదివినప్పుడు మీకు భారతీయ మీడియా ప్రాధాన్యతలు ఏమిటా అని ఆశ్చర్యం కలుగుతుంది. మన ఘనత వహించిన ప్రజాస్వామ్యానికి బాకా ఊదడం విషయమై అది కించిత్తు కూడా సిగ్గుపడకపోవడం గురించి విస్మయం కలుగుతుంది.
    మిట్ట చాలా మంచి పుస్తకం రాశారని చెప్తే సరిపోదు. గుజరాత్‌లో మోదీ నెలకొల్పిన 'నమూనా న్యాయం'ను ఈ పుస్తకం తూర్పారబట్టింది. భారత ఉదారవాద ప్రజాస్వామ్యంపై చాలా కటువైన వ్యాఖ్యానాలు చేసింది.  పత్రికా విలేకర్లతో సహా తగిన న్యాయ ప్రక్రియ మీద నమ్మకంతో కళ్లు మూసుకుని కూచున్న వాళ్లందరినీ మిట్టా ఎద్దేవా చేస్తాడు. వారి మూలంగానే న్యాయ వ్యవస్థను తెలివిగా కుప్పకూల్చారనీ, అది మోదీకీ ఆయనకంటే ముందరి 1984 అల్లర్లలో పాలుపంచుకున్న పలుకుబడివున్న నేతలకీ ''క్లీన్‌ చిట్‌''ని ప్రసాదించిందని అంటారు.
- రాజ్‌దీప్‌ సర్‌దేశాయ్‌, హిందుస్థాన్‌ టైమ్స్‌


1984 దిల్లీ నుండి 2002 గుజరాత్‌ వరకు ... వ్యవస్థల వైఫల్యంపై పంచనామా

రచన : మనోజ్‌  మిట్ట  &  హెచ్‌.ఎస్‌ . ఫూల్కా


ఆంగ్లమూలం: When A Tree Shook Delhi, The 1984 Carnage and its Aftermath by Manoj Mitta and H.S. Phoolka, Lotus Collection, Roli Books, New Delhi, © Manoj Mitta and H.S. Phoolka                        
The Fiction of Fact-finding: Modi and Godhra, HarperCollins Publishers India, 2014                     © Manoj Mitta 2014

తెలుగు అనువాదం :  ప్రభాకర్‌ మందార, రివేరా

ప్రధమ ముద్రణ : సెప్టెంబర్ 2015 

441 పేజీలు, వెల : రూ. 250/-

ప్రతులకు వివరాలకు:  
 హైదరాబాద్‌ బుక్‌ ట్రస్ట్‌, 
ప్లాట్‌ నెం. 85, బాలాజీ నగర్‌, గుడిమల్కాపూర్‌,
హైదరాబాద్‌ - 500006
ఫోన్‌ : 040 2352 1849
ఇమెయిల్‌ : hyderabadbooktrust@gmail.com
 

Tuesday, September 15, 2015

పురాణాలు - మరోచూపు - బి. విజయభారతి

పురాణాలు - మరోచూపు - బి. విజయభారతి

ఆధునిక సమాజంలో సమస్యలెన్నో ఉండగా పురాణ కథల గురించి ఇంకా రాయ వలసిన అవసరం ఏమిటీ అని చాలామంది అనుకోవచ్చు. స్వశక్తినీ స్వయంకృషినీ పక్కకు పెట్టి దేవుళ్ళను మొక్కుకోవటాలూ దేవుళ్ళమీద ఆధారపడటాలూ రోజురోజుకూ ఎక్కువవటం గమనించాక మహాత్మా జోతిరావ్‌ ఫూలే (1827-1890), డా. బి.ఆర్‌. అంబేడ్కర్‌ (1891- 1956), శ్రీ మాదరి భాగ్యరెడ్డి వర్మ (1888-1939) గార్ల భావజాలాన్ని వర్తమాన సమాజానికి అందించవలసిన అవసరం ఉన్నదనిపించింది.

    భారతదేశంలో మతమే ప్రజల జీవన విధానాన్ని నిర్దేశిస్తున్నది. ముఖ్యంగా కింది కులాల ప్రజలకు పురాణ పాత్రలు, రామాయణ, మహాభారతాలలోని పాత్రలూ ఆదర్శం. ఆ పాత్రల గురించి వారికి తెలియజెప్పవలసి ఉంది.

    శూద్ర కులాలనూ స్త్రీలనూ విద్యకు దూరం పెట్టినప్పటికీ పురాణాలలోనివిగా విన్న విషయాలను వారే బలంగా నమ్ముతున్నారు. ఆచరణలో పెడుతున్నారు. వాస్తవ విషయాలను స్వయంగా చదవకపోవడం వల్లనూ పురాణాలను ప్రశ్నించకూడదనే ఆంక్షలవల్లనూ ఈ పరిస్థితి ఏర్పడింది. పురాణాలలోని సంఘటనలనూ వాటి పూర్వాపరాలనూ తార్కికంగా పరిశీలించిన మహాత్మా జోతిరావ్‌ పూలే అసుర చక్రవర్తులను స్థానికులుగా పరిపాలనా దక్షులుగా, ధర్మ ప్రవర్తకులుగా, ప్రజలకు సమన్యాయం అందించిన మానవతావాదులుగా గుర్తించారు. పురాణాల పేరిట, ధర్మశాస్త్రాల పేరిట, ప్రజలను - ముఖ్యంగా రైతులనూ కింది వర్గాల వారినీ దోచుకుంటున్న పురోహిత వ్యవస్థను ప్రశ్నించారు. తాను కనుగొన్న వాస్తవాలను  రచనల ద్వారా, రాత్రి పాఠశాలల ద్వారా, దృశ్య కళారూపాల ద్వారా ప్రజలలో ప్రచారం చేశారు.

    జోతిరావ్‌ పూలే ఆలోచనా ధారను డా. బి.ఆర్‌. అంబేడ్కర్‌ మరింత ముందుకు తీసుకువెళ్ళారు. వైదిక మతం గురించీ వర్ణ ధర్మాల గురించీ, రాముని, కృష్ణుని రహస్యాల గురించీ చర్చించారు. ఎవరైతే మన స్థానిక వీరులైన అసురులను తుదముట్టించారో వారినే మనం పూజించటం తగనిపని అని భాగ్యరెడ్డి వర్మ చెప్పారు. ఆర్య - ఆర్యేతర ఘర్షణలలోని వాస్తవాలను చిన్న చిన్న నాటకాలుగా ప్రదర్శింపజేసి ప్రజలను చైతన్య పరచారు.

    వివేకానందుడు (1863-1902) తన చివరి రోజులలో మత సంస్కృతిలోని దోషాలను గురించి ఆందోళనపడ్డాడు. ''మతంలో ఏమీ దోషంలేదు. జనపీడన యంత్రాంగాన్ని ప్రవేశపెట్టిన కపట మతాచార్యులదే దోషం'' అన్నాడు. వేదాలు, రామాయణ, మహాభారతాలు, అష్టాదశ పురాణాలు అప్పటప్పటి సామాజిక రాజకీయ పరిస్థితులను మానవ మనస్తత్వాలను, ప్రతిబింబిస్తూ ఉన్న రచనలు  వాటిని ఉద్దేశపూర్వకంగా మత ధర్మాలతో ముడిపెట్టడం జరిగింది. అలా ముడిపెట్టడం వర్గ ప్రయోజనాల కోసమే.
.....    ...   ...
శంబూకుని పట్ల అమలు అయిన న్యాయమే దళితులపట్ల అమలవుతూ ఉంది. ఊచకోతలలో దళితులది అసుర వారసత్వమే. రామాయణాన్ని అందులోని విషయాలనూ ప్రామాణికంగా ఇప్పటికీ భావిస్తుంటారు. అందులోని మత ధార్మిక విషయాలను 21వ శతాబ్దపు దృష్టితో కాకపోయినా వాస్తవాల కోసమైనా తెలుసుకోవాలి. పురాణాలకు పెరుగుతున్న ఆదరణ దృష్ట్యా ఈ వ్యాసాల అవసరం ఉన్నదని భావిస్తూ నా పరిశీలనను మీ ముందు ఉంచు తున్నాను. వర్తమానాన్ని అర్థం చేసుకోవటానికి గతాన్ని తెలుసుకోవటం అవసరం.

(ముందుమాట నుంచి )


పురాణాలు - మరోచూపు
బి. విజయభారతి

380 పేజీలు ; ధర : రూ. 200/-

అట్టమీద ఫోటో    : హరీష్‌ నాగరాజ్‌,  శ్రీ వినాయక తోలుబొమ్మల బృందం, నిమ్మలకుంట గ్రామం, అనంతపురం జిల్లా వారి నుంచి సేకరణ

మొదటి ముద్రణ : జూలై 2015

ప్రతులకు, వివరాలకు : హైదరాబాద్‌ బుక్‌ ట్రస్ట్‌, ప్లాట్‌ నెం. 85, బాలాజీ నగర్‌,గుడిమల్కాపూర్‌, 

హైదరాబాద్‌ - 500 006.

ఫోన్‌ : 040 2352 1849

19 సెప్టెంబర్ 2015 శనివారం సాయంత్రం లామకాన్ లో "1984 దిల్లీ, గుజరాత్ 2002 - వ్యవస్థల వైఫల్యంపై పంచనామా" పుస్తకావిష్కరణ సభ




హైదరాబాద్ బుక్ ట్రస్ట్ ప్రచురిస్తున్న
"1984 దిల్లీ, గుజరాత్ 2002 - వ్యవస్థల వైఫల్యంపై పంచనామా" తెలుగు పుస్తకానికి
మనోజ్ మిట్టా ప్రత్యేకంగా రాసిన ముందుమాట నుంచి ...
....
1978లో నల్లకుంట పోలీసులు రమీజాబీపై అత్యాచారంచేసి, ఆమె భర్తను కొట్టి చంపిన సందర్భంగా రాజుకున్న గొడవలతో నాకు తొలిసారిగా మత హింస అంటే ఏమిటో తెలిసింది. మర్రి చెన్నారెడ్డి నాయకత్వంలోని కాంగ్రెస్‌ ప్రభుత్వం పోలీసుల చర్యకు వత్తాసు పలుకుతూ రమీజాబీని వేశ్యగా చిత్రించింది. ఆమె రోడ్డు మీద విటుల కోసం ఎదురుచూసేదని ప్రచారం చేసింది.

అంతవరకు ప్రభుత్వ ఆస్తులను లక్ష్యం చేసుకుని సాగుతున్న విధ్వంసకాండ ఆ తరువాత మత హింసగా మారింది. ఆ తరువాత జస్టిస్‌ ముక్తదర్‌ కమిషన్‌ పోలీసుల వాదనను ఎంత ఎండగట్టినా 1978నాటి హింసాకాండ హైదరాబాద్‌ అంతటికీ మరీ ముఖ్యంగా పెద్ద ఎత్తున పాత బస్తీకి విస్తరించింది.

మేముండే మలక్‌పేట పాత బస్తీకి దగ్గర కాబట్టి అది తీవ్రస్థాయిలో మత హింస చెలరేగిన ప్రాంతాల్లో ఒకటిగా మారింది. తొమ్మిదవ తరగతి నుంచి పన్నెండవ తరగతి వరకూ నా చదువు ఈ గొడవలతో తరచూ కుంటుపడుతుండేది. మా ఇరుగు పొరుగు ప్రాంతాలు తరచూ కర్ఫ్యూ నీడలో బిక్కుబిక్కుమంటుండేవి.

హైదరాబాద్‌లో చదువుకుంటున్న రోజుల్లో 1984 ఆగస్ట్‌లో నేను చిట్టచివరి మత హింసాకాండను చూశాను. అత్యంత దారుణంగా జరిగిన మతోన్మాద హింసాకాండల్లో అదొకటి అని చెప్పవచ్చు. అప్పుడు మొత్తం 40 మంది బలయ్యారు.

అయితే, ఆ తరువాత కొద్ది నెలలకే దిల్లీలో చోటు చేసుకున్న దారుణ మారణకాండలో అధికారిక లెక్కల ప్రకారం 2,733 మంది బలైనట్టు తేలింది. హైదరాబాద్‌లోనే కాదు దేశంలోని మరే ఇతర ప్రాంతంలోనూ ఆ స్థాయిలో మతోన్మాద హింసకు చెలరేగిన దాఖలాలు లేవు.

దిల్లీలో జరిగిన మారణహోమం భారత దేశ చరిత్రనే ఒక మలుపు తిప్పింది. ఆ వెంటనే వచ్చిన లోక్‌సభ ఎన్నికలలో సిక్కు వ్యతిరేక ఉన్మాదాన్ని ఉపయోగించుకుని రాజీవ్‌ గాంధీ నాయకత్వంలోని కాంగ్రెస్‌ పార్టీ అనూహ్యమైన విజయాన్ని సొంతం చేసుకుంది.

1984 నాటి రక్తపాతంపై విచారణ జరిపిన మిశ్రా కమిషన్‌ చాలా అవకతవకగా వ్యవహరించింది. దానికి తోడు రాజీవ్‌ గాంధీ ప్రభుత్వం బాబ్రీ మసీదు ప్రాంగణంలో రామజన్మభూమి గుడికి తలుపులు తెరిచి మతోన్మాదులకు మరింత శక్తిని సమకూర్చింది.

షాబానో సమస్యపై ముస్లిలను సంతృప్తిపరిచేందుకు తీసుకున్న నిర్ణయానికి ప్రతిగా రామజన్మభూమి గుడికి తెరలేపినట్టు అనిపించినా ఆ చర్య హిందూ జాతీయవాదానికి అసలు ప్రతినిధిగా భావించబడే భారతీయ జనతా పార్టీకి ఒక వరంగా మారింది.

ఈ విధంగా మతపరంగా వేడెక్కి వున్న వాతావరణం మధ్య దిల్లీలో పత్రికా రచయితగా నా జీవితం ప్రారంభమయింది. నేను సహజంగానే 1984 నాటి హింసాకాండ బాధితులకు న్యాయం చేకూర్చాలన్న లక్ష్యానికి అంకితమయ్యాను.

హైదరాబాద్‌లో బాల్యం నుంచే నాలో లౌకికవాదం పట్ల ఏర్పడిన అభిమానమే ఎన్ని అడ్డంకులు ఎదురైనా వెనకాడకుండా ముందుకు సాగేందుకు దోహదం చేసిందని నేను భావిస్తున్నాను.

- మనోజ్ మిట్టా

(19 సెప్టెంబర్ 2015 శనివారం సాయంత్రం లామకాన్ లో జరిగే పుస్తకావిష్కరణ సభలో, చర్చలో పార్లమెంట్ సభ్యులు అసదుద్దీన్ ఒవైసీ, ప్రొఫెసర్ కోదండరాం, ప్రముఖ న్యాయవాది బొజ్జా తారకం లతో పాటు ఈ పుస్తక రచయితలు మనోజ్ మిట్టా, హెచ్ ఎస్ ఫూల్కాలు పాల్గొంటున్నారు)




Sunday, September 13, 2015

చరిత్ర రచనకు గీటురాయి - చందు (ఆదివారం ఆంధ్ర జ్యోతి)

చరిత్ర రచనకు గీటురాయి 

మార్క్సిస్టు మేధావిగా, మానవ హక్కుల ఉద్యమకారుడిగా ప్రసిద్ధులైన బాలగోపాల్ వివిధ సందర్భాల్లో చరిత్ర రచనా విధానంపై రాసిన వ్యాసాలను "చరిత్ర రచనపై బాలగోపాల్" పేరుతొ హైదరాబాద్ బుక్ ట్రస్ట్ వారు ఇప్పుడు పుస్తక రూపంలో తీసుకొచ్చారు.
...
చరిత్ర పరిశోధకులకే కాక చరిత్ర పట్ల ఆసక్తి ఉన్న పాటకులందరికీ ఈ వ్యాసాలు చరిత్రను ఎలా అర్ధం చేసుకోవాలనే విషయంలో గీటురాళ్ళుగా ఉపయోగపడతాయి. ఆయన అంచనాలు నేటి పరిస్థితులకు కూడా వర్తించడమే కాక నేటి సమస్యలకూ పరిష్కారాలు చూపిస్తున్నాయి.
- చందు
(ఆదివారం ఆంధ్రజ్యోతి 6-9-2015)
  


http://epaper.andhrajyothy.com/detailednews?box=aHR0cDovL2VjZG4uYW5kaHJhanlvdGh5LmNvbS9GaWxlcy8yMDE1MDkwNjA5MDUxMDQyMjU0NzMuanBn&day=20150906







Saturday, September 12, 2015

భారతదేశం ప్రజాస్వామ్యం - బి.ఆర్‌.అంబేడ్కర్‌

భారతదేశం ప్రజాస్వామ్యం 
- బి.ఆర్‌.అంబేడ్కర్‌

''ప్రజల ఆర్థిక, సామాజిక జీవితాల్లో విప్లవాత్మక మార్పులను ఏ రక్తపాతమూ లేకుండా తెచ్చే ప్రభుత్వరూపమే ప్రజాస్వామ్యం'' - అంబేడ్కర్‌

రాజ్యాంగం, ఓటు హక్కు, ఎన్నికలు ... ఈ మూడూ వుంటే చాలు ఆ దేశంలో ప్రజాస్వామ్యం వున్నట్లే అని భావించడం పొరపాటు. అవన్నీ పాలకవర్గానికే ఉపయోగపడుతున్నాయనీ, పైగా వారి పెత్తనానికి చట్టబద్ధత కల్పిస్తున్నాయనీ, సామాన్య జనానికి వాటివల్ల ఒరుగుతున్నదేమీ లేదనీ ఆవేదన చెందుతాడు అంబేడ్కర్‌.

ప్రజల మధ్య సామాజిక సమానత్వం, స్వేచ్ఛ లేనప్పుడు ఆ ప్రజాస్వామ్యానికి అర్థంలేదు.

సామాజిక సమానత్వానికి, ఆదర్శాలకు, సమైక్యతకు భారతదేశంలో కుల వ్యవస్థ పెద్ద అడ్డంకి. అది ప్రజాస్వామ్య మూలాలను తొలచివేస్తోంది.

ఒక కులం వారు ఒక వృత్తికే కట్టుబడివుండాలనడం ప్రజాస్వామ్య మూలసూత్రాలకే విరుద్ధం. దొంతరలతో కూడిన కులవ్యవస్థ వల్ల వెనుకబడిన, దళితకులాల్లో కూడా ఒకరు మరొకరికంటే ఎక్కువనో తక్కువనో భావిస్తున్నారు.

ఏ కులంవాడూ తనకంటే తక్కువ కులం వాడి హక్కులకోసం పోరాడేందుకు ముందుకురాడు. భారతీయులు కుల ప్రాతిపదికనే ఓటు వేస్తారు. చివరికి పార్టీలు కూడా ఆ నియోజకవర్గంలో ఏ కులం ఓటర్లు ఎక్కువగా వుంటే ఆ కులం అభ్యర్థినే పోటీకి నిలబెడుతున్నాయి.

భారతీయు ఆలోచనలు అడుగడుగునా తప్పుడు విలువలతో, తప్పుడు దృక్పథాలతో పక్కదార్లు పడుతున్నాయి. ప్రస్తుత విద్యావిధానం కూడా కులవ్యవస్థను పెంచి పోషిస్తోందే తప్ప కుల నిర్మూలనకు ఏమాత్రం దోహదం చేయటంలేదు.

చదువుకున్న వ్యక్తుల్లో కూడా సామాన్యులకంటే ఎక్కువగా స్వార్థం, కుల పిచ్చి పెరిగిపోవడం గమనించవచ్చు.

ఇలాంటి పరిస్థితుల్లో మన పార్లమెంటరీ ప్రజాస్వామ్యం భవిష్యత్తు ఏమైపోతుంది?
మన జ్రాస్వామ్యానికి దిక్కెవరు?
దీనిని ఎలా రక్షించుకోవాలి?
అనే అంశాలపై డా. అంబేడ్కర్‌ ఆలోచనల సమాహారమే ఈ పుస్తకం.



భారతదేశం ప్రజాస్వామ్యం
- బి.ఆర్‌.అంబేడ్కర్‌


ఆంగ్లమూలం: Dr.Bahasaheb Ambedkar Writings and Speeches
తెలుగు అనువాదం :  ప్రభాకర్‌ మందార


36 `పేజీలు , వెల : రూ . 20 /-

ప్రధమ ముద్రణ: మార్చ్ 2005
పునర్ముద్రణ : 2014, 2015
ప్రతులకు వివరాలకు:

: హైదరాబాద్‌ బుక్‌ ట్రస్ట్‌, 

ప్లాట్‌ నెం. 85, బాలాజీ నగర్‌, గుడిమల్కాపూర్‌,
హైదరాబాద్‌ - 500006
ఫోన్‌ : 040 2352 1849
ఇమెయిల్‌ : hyderabadbooktrust@gmail.com

: సెంటర్‌ ఫర్‌ దళిత్‌ స్టడీస్‌,
ఇం. నెం. 3-4-142/6,
ఫస్ట్‌ ఫ్లోర్‌, బర్కత్‌పుర,
హైదరాబాద్‌ - 500027
ఫోన్‌: 040 23449192

Friday, September 4, 2015

మానవతామూర్తి సీకే (ఆంధ్రజ్యోతి 4 సెప్టెంబర్ 2015 ఎడిటోరియల్ పేజి)

మానవతామూర్తి సీకే

(ఆంధ్రజ్యోతి 4 సెప్టెంబర్ 2015 ఎడిటోరియల్ పేజి)

సీకే చాలా తక్కువగా మాట్లాడేవాడు. ఎల్లప్పుడూ ఎదుటివాళ్ళు చెప్పేదాన్ని వినేవాడు. ఆయన తరానికి చెందిన ఏ కమ్యూనిస్టులోనూ అంతగా కనపడని అరుదైన లక్షణం ఇది. తప్పులు దిద్దుకోవటానికి సిద్ధంగా ఉండేవాడు. నాకు తెలిసి చాలామంది కమ్యూనిస్టులకు భిన్నంగా - సీకే మహిళలు, పేద ప్రజల పట్ల ఎంతో సున్నితంగా, ఆర్తితో వ్యవహరించేవాడు. దీనితో పోలిస్తే ధనవంతుల పట్ల మాత్రం కొంత కఠినంగా వుండేవాడని చెప్పుకోవచ్చు. విరాళాలు సేకరించటం కోసం మేం ఎవరివద్దకన్నా వెళ్ళినప్పుడు వాళ్ళు- కొత్త ఇల్లు కట్టుకున్నామనీ లేదా కూతురి పెళ్ళి చేశామనీ, అందువల్ల విరాళం ఇవ్వలేమనీ అన్నారనుకోండి, సీకే వాళ్ళను అస్సలు వదిలేవాడు కాదు. ‘‘ఆహా! సరిగ్గా అందుకోసమే నీ దగ్గరికి వచ్చాం. ఆ పనులన్నింటికీ నువ్వు బాగానే ఖర్చుపెట్టావని విన్నాం. అందుకే అసలు నిన్ను మొదట్లో అడగాలనుకున్న మొత్తానికి ఇప్పుడు రెట్టింపు అడుగుతున్నాం’’ అనేవాడు. పేదల పెన్నిధిగా పేరున్న ప్రముఖ ఐఏఎస్‌ అధికారి ఎస్‌.ఆర్‌. శంకరన్‌, సీకే గురించి కొంత సరదాగా మాట్లాడుతూ ‘‘నేను భయపడే కొద్దిమంది వ్యక్తుల్లో సీకే కూడా ఒకడు. ఆయన మనకేదైనా పని అప్పగిస్తే, దాన్ని చెయ్యకుండా తప్పించుకోవడం సాధ్యమయ్యేదే కాదు’’ అనేవాడు.

మిగతా కమ్యూనిస్టులకంటే సీకేను భిన్నంగా నిలబెట్టిన అంశాలేమిటి? సీకే ఎక్కడికి వెళ్లినా ప్రజల్ని ఇబ్బందులపాలు చేస్తున్న రోజువారీ సమస్యలను, వారి వ్యక్తిగత సమస్యలను పట్టించుకునేవారు. ఏ ఇంటికి వెళ్లినా- తనకు పని ఉన్నది ఆ ఇంట్లో మగమనిషితోనే కావచ్చు, అయినా ఇంట్లో ఆడమనిషిని కచ్చితంగా పలకరించేవాడు సీకే. ఎలా వున్నావు, పిల్లలు బాగున్నారా, వాళ్ళ ఆరోగ్యం, చదువులు ఎలా వున్నాయని అడిగి మరీ తెలుసుకునేవాడు. ఎవరికన్నా వ్యక్తిగత సమస్యలున్నట్టు తన దృష్టికొస్తే, వాటిని పరిష్కరించేందుకు వాళ్ళకి సహాయపడేవాడు. అందుకోసం, ఎంత సమయం పట్టినా శ్రద్ధ వీడే వాడు కాదు. తరచూ ఆరోగ్య సమస్యలు ఆయన దృష్టికి వచ్చేవి. కాల క్రమంలో ఆయనకు ఎంతోమంది డాక్టర్లతో, వివిధ వైద్య విభాగాలకు చెందిన స్పెషలిస్టులతో పరిచయాలు పెరిగాయి. డబ్బులు చెల్లించి వైద్యం చేయించుకోలేని ఎంతోమంది రోగులకు ఆయన తన పరిచయాల ద్వారా ఉచితంగా వైద్యం చేయించేవాడు. డాక్టర్లు డబ్బులు చెల్లించగలిగిన సామర్థ్యం వున్న రోగులను చూసినంత శ్రద్ధగా పేదవారిని కూడా చూడాలని, వీలైతే ఇంకొంచెం ఎక్కువగానే చూడాలని ఆయన ఆశించేవాడు. ఈ మాట పైకి అనకపోయినా ఆయన ఉద్దేశం అదే, ఆయన తీసుకొచ్చిన రోగుల పట్ల వైద్యులు కూడా అలాగే వుండేవారు. ఎవరినైనా వైద్యం కోసం ఆసుపత్రిలో చేర్పించాక ఆయన క్రమం తప్పకుండా వెళ్ళి వాళ్ళను చూసేవాడు, మందులు కొనిచ్చేవాడు, అలాగే వైద్య పరీక్షలకీ, డాక్టర్లు, సర్జన్లు వచ్చి వాళ్ళని చూసేందుకు అన్ని ఏర్పాట్లూ చేసి, వాళ్ళు క్షేమంగా ఇంటికి చేరుకునేంత వరకూ భరోసాగా వెంటవుండే వాడు. దీని గురించి వల్లంపాటి వెంకట సుబ్బయ్య ఇలా గుర్తు చేసుకున్నాడు...

‘‘నా సమస్య వెంటనే ఆయన సమస్యగా మారిపోతుంది. జేఎన్‌టీయూ హాస్టల్‌లో నా కొడుకు వున్నప్పుడు టైఫాడ్‌ జ్వరం వచ్చి జబ్బు పడ్డాడు. సీకే వాడిని అపోలో ఆసుపత్రిలో చేర్పించి, వైద్య ఖర్చులన్నీ చెల్లించి వాడు బాగయ్యాక తన ఇంటికి తీసుకొచ్చి, కోలుకునేంత వరకూ తనతోపాటే వుంచుకున్నాడు. ఆ తర్వాత పిల్లాడిని మదనపల్లికి పంపించేప్పుడు... అప్పుడు చెప్పాడు నాకు.. ‘అబ్బాయు జబ్బుపడ్డాడు. ఇప్పుడు చాలా వరకు ఫర్వాలేదు. ఉదయం బస్సుకు వస్తున్నాడు. ఇంటికి తీసుకువెళ్ళు’ అన్నాడు. సీకే ఎడంచేత్తో చేసిన మంచి పనులేమిటో కుడి చేతికి కూడా తెలిసేది కాదన్న మాట. అట్లా వుండేది ఆయన వ్యవహార శైలి.’’5,

2013 సెప్టెంబర్‌లో జరిగిన సీకే సంస్మరణ సభలో సీపీఐ(ఎం) నాయకుడు రాఘవులు మాట్లాడుతూ ‘‘కమ్యూనిస్టు పార్టీల్లో దీర్ఘకాలిక లక్ష్యాలతో పాటు, మనం ప్రజలు ఎదుర్కొంటున్న రోజువారీ సమస్యలను కూడా పట్టించుకోవాలని సీకే నాతో చెప్పేవాడు. పాలకవర్గ పార్టీలు ప్రజలకు సంబంధించిన అన్ని సమస్యలను... అది రేషన్‌ కార్డులు కావచ్చు, బడి, ఆసుపత్రి ఇలా అన్నింటినీ పట్టించుకుంటాయి. ఇలాంటి వాటన్నింటినీ మరి కమ్యూనిస్టులు ఎందుకు నిర్లక్ష్యం చేస్తారని తరచూ ప్రశ్నించేవాడు’’ అని గుర్తు చేసుకున్నాడు.

ప్రచురణ కోసం ఏదైనా పుస్తకాన్ని సిఫార్సు చేస్తే, వేర్వేరు వృత్తుల్లో, రకరకాల వ్యాపకాల్లో ఉన్న భిన్న నేపథ్యాల వ్యక్తుల నుంచి అభిప్రాయాలను తీసుకున్న తర్వాతే దానిపై ఒక దృక్పథాన్ని ఏర్పరచుకునేవాడు సీకే. అంత సున్నితమైన వ్యక్తి కూడా పుస్తకాల ఎంపిక విషయానికి వచ్చేసరికి మాత్రం చాలా నిక్కచ్చిగా ఉండేవాడు. ఈ విషయంలో ఒక్కోసారి రాజీనామా చేస్తానని కూడా బెదిరించే వాడు. చాలాకాలం పాటు ఆయన ‘స్టాలినిస్టు’గా వుండి పోయాడు. వీరాభిమానం కాదుగానీ, స్టాలిన్‌ పట్ల గౌరవంతో, ఆయన అందించిన సేవలను విలువైనవిగా పరిగణంచేవాడు సీకే. మానవ హక్కుల విషయంలో స్టాలిన్‌పై వున్న విమర్శలను ఆయన చాలా చిన్న అంశాలుగా కొట్టిపారేసేవాడు. అందుకని ఏ పుస్తకంలోనైనా స్టాలిన్‌ పట్ల విమర్శ ఉందని ఆయన దృష్టికి వస్తే, చికాకు పడటమే కాదు, ఆ పేరా ఏదో తొలగించే వరకూ ఊరుకునేవాడు కాదు.

అలాగని సీకే పిడివాదిలా, మారని మనిషేం కాదు. ‘నేనీ విషయంలో తప్పుచేశాను’ అని నిజాయితీగా ఒప్పుకోగలిగిన అతి కొద్దిమంది వ్యక్తుల్లో ఆయనా ఒకడు. ఈ సందర్భంగా నాకు అరుంధతీ రాయ్‌ రాసిన ‘ద గాడ్‌ ఆఫ్‌ ద స్మాల్‌ థింగ్స్‌’ పుస్తకం విషయంలో జరిగిన వాదోపవాదాలు గుర్తుకొస్తున్నాయి. ఆ పుస్తకాన్ని నేను చదివాను, నాకు చాలా నచ్చింది. అనువదించి, తెలుగులో తెస్తే బాగుంటుందని అనుకున్నాను. కానీ ఆ పుస్తకంలో ఒక పాత్ర ద్వారా కేరళకు చెందిన ప్రముఖ కమ్యూనిస్టు నాయకుడు ఇ.ఎమ్‌.ఎస్‌. నంబూద్రిపాద్‌ మీద చేసిన వ్యాఖ్యానాలను చూసి, సీకే తీవ్రంగా బాధపడి ఆ పుస్తకాన్ని అనువదించాల్సిన అవసరం లేదని చెప్పేశాడు. మరుసటి సంవత్సరం, అభివృద్ధి గురించి, భారీ డ్యాముల పేరుతో జరుగుతున్న మానవ హక్కుల హననం గురించీ తీవ్ర నిరసన స్వరంలో అరుంధతీ రాయ్‌ రాసిన ‘ఫర్‌ ద గ్రేటర్‌ కామన్‌ గుడ్‌’ వచ్చింది. దాన్ని చదివిన తర్వాత సీకే ఆమె రచనలన్నింటినీ చదవటమే కాదు, మొదటి పుస్తకంపై తాను గతంలో వెల్లడించిన అభిప్రాయాలు సరైనవి కావంటూ తనను తానే సరిచేసుకున్నాడు. ఇదంతా ఎనభై ఏళ్ల వయసులో!’’

(స్వాతంత్య్ర సమరయోధుడు, కమ్యూనిస్టు, హైదరాబాద్‌ బుక్‌ ట్రస్ట్‌ వ్యవస్థాపకుల్లో ఒకరైన సీకే నారాయణరెడ్డి జీవిత చరిత్ర ‘నేను కమ్యూనిస్టుని’ నుంచి కొన్ని భాగాలు ఇవి. 
రేపు ఆయన ద్వితీయ వర్థంతి)

http://epaper.andhrajyothy.com/detailednews?box=aHR0cDovL2VjZG4uYW5kaHJhanlvdGh5LmNvbS9GaWxlcy8yMDE1MDkwNDA5MDQwMjE5MDQ2NDEuanBn&day=20150904



Thursday, September 3, 2015

'బహుళత్వ భారతంలో కలుపుకుపోయే రాజకీయాల'పై చర్చ 19 సెప్టెంబర్ 2015 శనివారం సాయంత్రం 5-30 కు లామకాన్ లో

చర్చకు ఆహ్వానం

'బహుళత్వ భారతంలో కలుపుకుపోయే రాజకీయాల' పై
ఆసక్తికరమైన చర్చ నిర్వహిస్తున్నాం

ఇందులో-
పార్లమెంట్ సభ్యులు అసదుద్దీన్ ఒవైసీ,
ప్రొఫెసర్ కోదండరాం
సీనియర్ అడ్వొకేట్ బొజ్జా తారకం

మరికొంతమంది ప్రముఖులు
పాల్గొంటున్నారు.

సందర్భం:
మనోజ్ మిట్టా, హెచ్.ఎస్.ఫూల్కా రాసిన
"దిల్లీ 1984 నుండి గుజరాత్ 2002 వరకు : రాజకీయ వైఫల్యం పై పంచనామా " పుస్తకావిష్కరణ.
("వెన్ ఎ ట్రీ షుక్ దిల్లీ",  "ది ఫిక్షన్ ఆఫ్ ఫాక్ట్ ఫైండింగ్ : మోది అండ్ గోద్రా" అనే రెండు పుస్తకాల అనువాదం)

సమయం: 19 సెప్టెంబర్ 2015 శనివారం సాయంత్రం 5-30 కు

వేదిక : బంజారా హిల్స్, రోడ్ నెం 1లో జీవీకే మాల్ ఎదురుగా వున్నలామకాన్


మీకిదే ఆహ్వానం

- హైదరాబాద్ బుక్ ట్రస్ట్
ఫోన్: 040 2352 1849



 





Tuesday, September 1, 2015

నేను కమ్యూనిస్టుని - అతిసాధారణుడు సీకే జ్ఞాపకాలు - గీతా రామస్వామి



నేను కమ్యూనిస్టుని - అతిసాధారణుడు సీకే జ్ఞాపకాలు

సీకే నారాయణరెడ్డి (1925-2013) నిశ్శబ్దంగా పనిచేసుకుటూపోయే గొప్ప పనిమంతుడు. స్వాతంత్య్ర సమరయోధుడు,తలకెత్తుకున్న విలువలను తనువు చాలించేదాకా నిలబెట్టుకున్న కమ్యూనిస్టు. హైదరాబాద్‌ బుక్‌ ట్రస్ట్‌ వ్యవస్థాపకుల్లో ఒకరు. అతిసాధారణంగా కనిపిస్తూనే గొప్ప మార్పు కోసం జీవితపర్యంతం శ్రమించిన ఇటువంటి మౌన ఋషుల, మానవతా మూర్తుల చరిత్ర బయటకు రావటం అవసరమని భావించి ఈ పుస్తకాన్ని మీ ముందుకు తెస్తోంది హెచ్‌బీటీ

.... ... ...

రోడ్డు మీద వెళుతున్నప్పుడు ఎదురుగా ఎక్కడన్నా అరటిపండు తొక్క కనబడితే పనిగట్టుకుని అక్కడి వరకూ వెళ్లి.. వంగి, దాన్ని చేత్తో తీసి దూరంగా చెత్తకుప్పలో పడేసే నిండు వృద్ధుడిని చూస్తే మనకు ఏమనిపిస్తుంది?

అసలు అలాంటి వారు ఉంటారా అనిపించటం సహజం.

ఎందుకింత, అవసరమా అంటే 'జనం జారి పడిపోరూ' అనేవాడాయన.

ఇదొక్కటే కాదు.

స్వాతంత్య్ర సమరయోధుడు, జీవిత పర్యంతం కమ్యూనిస్టుగా జీవించినవాడు, హైదరాబాద్‌ బుక్‌ ట్రస్ట్‌ వ్యవస్థాపక సభ్యుల్లో ఒకరైన సి.కె.నారాయణరెడ్డి  (చల్లా కృష్ణ నారాయణరెడ్డి) గురించి చెప్పటం మొదలుపెడితే ఇలాంటి విషయాలు ఇంకెన్నెన్ని ప్రస్తావనకు వస్తాయో లెక్కలేదు.

పట్టణాల్లో పేదలు ఎదుర్కొంటున్న పిచ్చి కుక్కల బెడద, గ్రామాల్లో పేదలను వేధిస్తున్న ఫ్లోరోసిస్‌ వ్యాధి, శివారు ప్రాంతాల్లో పారిశ్రామిక వ్యర్థాలతో ప్రజలు పడుతున్న ఇబ్బందుల వంటి ఎవరికీ పట్టని, ఎవరి దృష్టికీ రాని అనేకానేక 'చిన్న చిన్న' విషయాలను ఆయన ఎంతో శ్రద్ధగా పట్టిరచుకునేవాడు.

ఆసుపత్రుల్లో, పాఠశాలల్లో దళితులకు ప్రవేశాన్ని నిరాకరిస్తుండటం, శాసన సభ్యులు, మాజీ శాసనసభ్యులు ప్రజాధనాన్ని దుర్వినియోగం చేస్తూ తమకు తామే జీతభత్యాలను, ఇతర సదుపాయాలను పెంచుకోవడం వంటి - కమ్యూనిస్టులు తమకు సాంప్రదాయేతరమైన విషయాలుగా భావించే - ఎన్నో సమస్యలపై ఆయన నిబద్ధతతో పోరాడాడు. వృద్ధాప్యం, అనారోగ్యం కారణంగా తప్పనిసరై ఇంటికి పరిమితమవ్వాల్సి వచ్చేంత వరకూ కూడా ఆయన సామాజిక కార్యకర్తలందరికీ చిరపరిచితుడు. నిత్యం ఏదో ఒక సహాయం కోరుతూ ఎందరో ఆయన్ని కలిసేవారు. ఆయన కూడా న్యాయమైన ప్రతి సమస్యనీ ఎంతో శ్రద్ధగా కడదాకా పట్టించుకుని, ఆ పని పూర్తయ్యే వరకూ విశ్రమించేవాడు కాదు. ....









నేను కమ్యూనిస్టుని  - అతిసాధారణుడు సీకే జ్ఞాపకాలు

- గీతా రామస్వామి

వెల: రూ. 30


పతులకు, వివరాలకు:
హైదరాబాద్‌ బుక్‌ ట్రస్ట్‌,
ప్లాట్‌ నెం. 85, బాలాజీ నగర్‌,
గుడిమల్కాపూర్‌, హైదరాబాద్‌ - 500 006

ఫోన్‌ : 040 23521849
ఇ మెయిల్ ఐ డి : hyderabadbooktrust@gmail.com

 








Wednesday, August 12, 2015

కొండపల్లి కోటేశ్వరమ్మ ఆత్మకథ నిర్జన వారధి తమిళ అనువాదం " ఆలట్ర పాలం "

కొండపల్లి కోటేశ్వరమ్మ ఆత్మకథ నిర్జన వారధి తమిళ అనువాదం " ఆలట్ర పాలం "

"కొండపల్లి కోటేశ్వరమ్మ ఆత్మకథ నిర్జన వారధి తమిళ అనువాదం 'ఆలట్ర పాలం' వెలువడింది. గౌరీ కిరుబనందన్ (0 9791 069 485) అనువదించిన ఈ పుస్తకాన్ని 30 జూలై 2015 న తమిళనాడు లోని ఈరోడ్ లో జరిగిన ఒక కార్యక్రమం లో శ్రీమతి అంబై ఆవిష్కరించారు. సభకు శ్రీ నంజిల్ నాదన్ అధ్యక్షత వహించారు. 


The Sharp Knife of Memory పేరుతో ఈ పుస్తకం ఆంగ్లానువాదం ఇటీవలే వెలువడిన విషయం విదితమే. నిర్జన వారధిని వి.బి.సౌమ్య ఇంగ్లిష్ లోకి అనువదించారు. 




ஜூலை 30th அன்று ஈரோட் ல் நடந்த  புத்தக வெளியீட்டு விழாவில் எடுத்த புகைப்படத்தை
இத்துடன் இணைத்துள்ளேன்.

கொண்டபல்லி கோடேஸ்வரம்மா அவர்களின் சுயசரிதை நிர்ஜனவாரதியின் தமிழாக்கம் "ஆளற்ற பாலம்"

.

చరిత్ర చాటిన సత్యం - వి. ప్రతిమ (మాతృక, మాస పత్రిక ఆగస్ట్ 2015 సంచిక)



      చరిత్ర  చాటిన  సత్యం

నల్లజాతి  నిప్పు కణిక  సోజర్నర్  ట్రూత్’ నవల పరిచయం  
వి. ప్రతిమ

స్వేచ్ఛ’ అన్న పదమే ఎరుగని బానిసలకు పిల్లలపై ప్రేమే తప్ప హక్కుండదు. ఇది రాక్షసులు రాసిన చట్టం. ఏ మనిషయినా ఎన్నెన్ని అవసరాలూ, అత్యవసరాలనైనా వొదులుకోగలరు కానీ తమ కడుపులో పుట్టిన పిల్లలు తమ కళ్ళ ముందు పెరగాలని కోరుకోవడం అత్యాశేమీ కాదు గదా. నవమాసాలు మోసి అయిదారేళ్ళు ప్రేమతో పెంచుకున్న పిల్లల్ని యజమాని తమ కళ్ళ ముందే వేలం వేసి అమ్మేసుకుంటుంటే చూస్తూ వూరుకోవాలి.

కన్నవాళ్ల కడుపుకోత యజమానికి పట్టదు. ఇది ఏ ఒక్కరిదో, ఒక యింటిదో, ఒక వూరిదో కాదు మొత్తం అమెరికా సంయుక్త రాష్ట్రాల్లో నివసించిన ఒకానొక జాతి మొత్తానిది. 

ఆ జాతి ఏది? ఆఫ్రికా అడవుల్లో పచ్చి నెత్తురు తాగే క్రూరమృగాల్ని ఎదిరించగలిగిన ఒక మహా జాతి... అదే నల్ల జాతి. ఆఫ్రో అమెరికన్ జాతి. ఆ బడబాగ్నిని ఎదిరించి నిలిచిన ఇసబెల్లి కధ ఇది. ఒక్క బానిసత్వమే కాదు యింకా అన్ని రకాల వివక్షలకూ అవమానాలకూ ఎదురు నిలిచి పోరాడి తాను నిప్పుకణికయి రగులుతూ తన చుట్టూ ప్రపంచానికి వెలుతురు పంచిన ‘సోజర్నర్ ట్రూత్’ కధ యిది. 
చీకటి ఖండం అని పిలవబడే ఆఫ్రికా ఖండంలో స్వేచ్ఛగా వీధుల్లో పొలాల్లో తిరుగుతోన్న అమాయకమైన ఆఫ్రికన్స్ ను మోసంతో చేబట్టి కఠినంగా హింసించి ఇనుప గొలుసుల్తో బంధించి నరకం చూపించి నౌకలెక్కించి అమెరికా సంయుక్త రాష్ట్ర తీరాలు చేర్చి ఉక్కులాంటి నల్లజాతీయుల్ని బానిసలుగా తెగనమ్మి డబ్బు చేసుకున్నారు నరమాంసపు వ్యాపారులైన తెల్లవాళ్ళు. పంధొమ్మిదో శతాబ్దపు ప్రారంభంలో అమెరికా గడ్డ మీద వికృతరూపం దాల్చిన బానిసత్వం, విచ్ఛిన్నమైన నల్ల జాతీయుల లక్షల కుటుంబాల గురించీ గొలుసులతో బంధించబడి, కొరడా దెబ్బలతో పీల్చి పిప్పి కావించబడ్డ శరీరాలూ … యివన్నీ మనం గతంలో విని కరిగి నీరయినవే. 

అలెక్స్ హేలీ ‘రూట్స్’ లోనూ, మార్టిన్ లూధర్ కింగ్ జీవిత చరిత్రలోనూ, యింకా మాల్కం ఎక్స్ జీవిత చరిత్రలోనూ చాలా వరకు చదువుకొన్నవే. అయినా యిది ఆఫ్రికన్ అమెరికన్ స్త్రీ జీవిత చరిత్ర.  తొమ్మిదేళ్ళ వయసులో విక్రయించబడి తల్లిదండ్రుల్నీ, కుటుంబాన్నీ కోల్పోయి, ఒంటరిగా విలపించి కుటుంబం కోసం పరితపించిపోయిన ఆ చిన్నారి పాప ఎట్లా ఆ సంకెళ్ళను తెంచుకుని స్వేచ్ఛాగానమాలపించిందో తెలిపే నల్లజాతి బానిసోద్యమకారిణి  జీవితం యిది. 

ఆమెకు చదువు లేదు. అక్షరమంటే తెలియదు, గురువంటే అసలే తెలీదు. కాఠిన్య జీవితమే ఆమెకు చదువు నేర్పించింది. ఆమె మనసే ఆమెకు గురువు. తెల్లవారి దౌష్ట్యమే పుస్తకం. గుండెల్లో రగిలే మంటల్ని పాటలుగా రూపాంతరం చెందించి ఆలపించి పాటల్నే పావురాలుగా ఎగురవేసిన స్వేచ్చా గానలహరి ఆమె.

బానిస పిల్లలకి పుట్టినప్పటి నుండే వినయంగా, బానిసత్వంతో మెలగడమెలాగో తలిదండ్రులే నేర్పిస్తారు. యజమాని మెప్పుతో స్వేచ్ఛ లభిస్తుందని ఆశపడి తన శరీరాన్ని మొత్తం పని అనే కొలిమిలో కాల్చుకోనేది బెల్లీ. ఒక్క క్షణం కూడా తీరిక లేకుండా యజమాని యింట్లో, పొలంలో పగలూ రాత్రీ ఎండా, గాలీ, వానా దేన్నీ లెక్క చేయకుండా ఏదో ఒక పని చేస్తూ ఉండేది. ఎప్పటికైనా తల్లిదండ్రుల్ని కలుసుకోగలనన్న నమ్మకంతో పనిచేస్తూనే ఉండేది. 

ఆ కల నిజమవకుండానే తల్లి మరణం ఆమెను ఎంతగానో క్రుంగదీస్తుంది. అయినా విలవిలలాడి పోతోన్న తండ్రిని తానే తల్లయి ఓదారుస్తుంది. “నాన్నా! వచ్చే పది సంవత్సరాలలో నల్లజాతి బానిసలందరికీ స్వేచ్ఛ వస్తుందట ... అప్పుడు ఎక్కడా బానిసత్వమే వుండదట. అందరూ చెప్పుకుంటున్నారు .. అప్పుడు నాకు స్వేచ్ఛ  వచ్చాక నిన్ను నాతో తీసుకుపోయి నా దగ్గరుంచుకొని అమ్మలాగా బాగా చూసుకుంటా ... అప్పటివరకూ దిగుల్లేక ఉండు నాన్నా’’అంటూ అమాయకంగా చెప్తుంది. 

తండ్రికి బాగా తెలుసు. అది కనుచూపు మేరలో లేదని. బానిసలకు మాతృప్రేమ, కన్నప్రేమ, సంతోషం, నిర్ణయాలు వంటి ఎన్నెన్నో అనుభూతులు కర్కశంగా సమాధి చేయబడ్తాయని. బానిసలకు యింటి పేరు ఉండదు. పేరు పక్కన తాము పని చేస్తున్న తమ యజమాని పేరు కలుపుతారు. ఇప్పుడు చాలామంది ఆడవాళ్ళు తమ పేరు చివర భర్త పేరు తగిలించుకోవడం బహుశ ఈ బానిస సంస్కృతికి ప్రతీకేమో అనిపిస్తుంది.
బానిసలకు కూడా ఒక పండగ వుంటుంది. ఆ పండగ వేడుకల్లో హఠాత్తుగా పరిచయమవుతాడు బాబ్. పక్క పక్క పొలాల్లో చెరొక యజమాని వద్ద పని చేస్తుంటారు. బాబ్ తో మాట్లాడటం బెల్లికి యిష్టంగా వుంటుంది. కానీ బాబ్ యజమాని కాటిలిన్ యిందుకు ఒప్పుకోడు. ఎందుకంటే వాళ్ళిద్దరూ పెళ్లి చేసుకుంటే పుట్టే పిల్లలు బెల్లి యజమాని డ్యూమండ్ కి చెందుతారు కాబట్టి. “మన అనుబంధంలో మాధుర్యం మనం ఆలోచిస్తుంటే యింకా మనకి పుట్టని బిడ్డలపై వచ్చే లాభం గురించి వాళ్ళాలోచిస్తున్నారు. ఎప్పుడెప్పుడీ బానిసత్వం నుండి బయట పడదామా అని మనం వున్నాం. వాళ్ళేమో మన బిడ్డల్ని బానిసలుగా మార్వడం గురించి ఆలోచిస్తున్నారు” అంటుంది బెల్లి. 

బానిసలకు సొంత ఆలోచన, ఆశ, ఉల్లాసం, స్పందనలూ ఉండరాదు. యజమానులు భరించలేరు. తన యజమానిని కాదని బెల్లి వద్దకు వచ్చిన బాబ్ వెంటాడబడి, వేటాడబడి కొట్టి చంపబడతాడు. తన మాసా కిందనే పనిచేసే మరో నిగ్గర్ ని తప్పనిసరిగా పెళ్లి చేసుకుంటుంది. పిల్లలని కంటుంది. నాలుగేళ్ళు కూడా నిండని తన కొడుకుని యజమాని అమ్మివేయడాన్ని తట్టుకోలేక అతడి మీద కక్ష పెట్టుకుంటుంది బెల్లి. అన్యోన్యంగా కాపురం చేసుకుంటూ చిలకా, గోరింకల్లా వున్న బిడ్డల్ని విడదీసి లాభానికమ్ముకోవడం, అర్ధరాత్రి తల్లి ఒడిలో ఆదమరిచి నిద్రిస్తోన్న పసికందుల్ని సైతం లాక్కొచ్చి వేలంలో తెగనమ్ముకోవడం తెల్లవాడికి ఉగ్గుతో పెట్టిన విద్య. 

తమ పిల్లల జోలికెళితే ఏ జంతువయినా మన మీద పడి కరుస్తుంది. కానీ కొండల్ని పిండి కొట్టగల కండలు తిరిగిన నల్లవారు మాత్రం మౌనంగా రోదించారే తప్ప ఎదిరించలేదు. ఎదిరించిన వారు బతకనూ లేదు. కానీ బెల్లి దెబ్బతిన్న కాలనాగులా సలసల మరుగుతోన్న రక్తంతో బుసలు కొడుతూ యజమాని డ్యూమండ్ని ఢీకొంటుంది. దెబ్బతిన్న ఆత్మాభిమానంతో బిగించి కట్టబడ్డ ఉక్కుసంకెళ్ళను  ఛేదించి, నిరంకుశమైన చీకట్లను చీల్చుకుంటూ, స్వచ్ఛమైన వెలుగురేఖలను వెదుక్కుంటూ విశాలమైన ప్రపంచంలోకి అడుగుపెడుతుంది.
1827వ సంవత్సరం జులై4వ తేదీ నాటికి 30 సంవత్సరాలు నిండిన బెల్లికి ఆమె నివస్తిస్తున్న రాష్ట్రంలో ఉన్న ప్రత్యేక చట్టం వలన బానిసత్వం నుండి విముక్తి లభించింది. బెల్లి నవ్య స్వేచ్ఛావలువలు చుట్టుకుని పదేపదే మురిసిపోయి తన అసలైన ప్రయాణాన్ని ప్రారంభించింది ... తన కొడుకు పీటర్ని వెదుక్కుంటూ. పైసా ఫలితం రాని శ్రమ చేసి చేసి కాయలు కాసిన చేతులతో, ఉగ్గు పాలిస్తూ పసిబుగ్గల్ని నిమిరిన చేతులతో ఒక నల్లజాతి మనిషి, అందునా స్త్రీ మొట్టమొదటిసారిగా నవ్యసమాజానికి నిలువెత్తు గురుతుగా నిలిచిన న్యాయస్థానంలో రిట్ వేసింది. అలా తెల్లవాడిని ఎదిరించి నిలిచి కోర్టులో గెలిచి తన కొడుకుని దక్కించుకొన్న తొలి తల్లి బెల్లి. అంతే కాకుండా ఆమె న్యూయార్క్ లో వున్నప్పుడు ఆమె మీద పడిన హత్యానేరాన్ని ఆధారంగా చేసుకొని చాలా వ్యతిరేకంగా రాసిన ఒక పత్రిక మీద కూడా రిట్ వేసి గెలిచింది. చట్టపరంగా ఇది ఆమె రెండో విజయం. 

ఆ తర్వాత తాను నల్లజాతి స్త్రీ అయినందుకుగాను తనను బస్సు ఎక్కనివ్వకుండా చేసినందుకు బస్ కండక్టరు మీద కోర్టులో రిట్ వేసి గెలవడమే కాకుండా ఆ తర్వాత నల్లజాతి వారందరూ బస్సులో ఎక్కేందుకు మార్గం సుగమం చేసింది. 
 
కుటుంబాన్ని భర్త కప్పచెప్పి, శృంఖలాలు అవి ఏ రూపంలో వున్నా సరే, శక్తివంతంగా బద్దలు కొట్టటం కోసం జీవితమంతా సంచారం చేసిన విముక్తి ఉద్యమనేత బెల్లి. ఇంకా చెప్పాలంటే స్త్రీల హక్కు, ఆస్తిహక్కు, ఓటు హక్కు యింకా జైళ్ల సంస్కరణవంటి అనేక అణచివేతల్ని ఎదిరించి నిలిచిన తొలితరం మహిళా ఉద్యమకారిణి ఆమె. అప్పటికి అరాచకంగా ఉన్న న్యూయార్కును వదిలి చాలా ప్రాంతాలు తిరగదలిచి తన పేరును సోజర్నర్ ట్రూత్ గా మార్చుకుంటుంది. సోజర్నర్  అంటే ‘సంచారిణి’ అని అర్ధం. సత్యం కోసం అన్వేషిస్తూ తిరుగుతోంది కాబట్టి ఆ సత్యమే ఆ యింటి పేరై  ‘సోజర్నర్  ట్రూత్’ గా మారింది. 

ఎవరు తనతో నడిచినా నడవక పోయినా తాను మాత్రం ఎన్నో పట్టణాలనీ, పల్లెల్నీ  తిరుగుతూ యింకా మిగిలి ఉన్న బానిసత్వాన్ని విముక్తి చేయడం కోసం ముందుకు నడిచింది. బానిస సంకెళ్ళను ముక్కలు ముక్కలుగా విడగొట్టి తమ జాతీయులకు విమోచన కల్పించడానికి అలుపెరుగక శ్రమించిందామె. తిండి, నిద్ర, విశ్రాంతి కోసం ఎప్పుడూ తపించకుండా చాలా ప్రాంతాలని సుడిగాలిలా చుట్టేసిందామె. ఒక వైపు బానిసత్వ వ్యతిరేకోద్యమంలో పాల్గొంటూనే మరో వంక స్త్రీల హక్కుల సభలు ఏర్పాటు చేసి ఎన్నో చర్చలు చేసేది. మరో వంక నీగ్రోల ఓటుహక్కు కోసం అనేకానేక మందితో పరిచయం ఆమెను మరింత ముందుకు నడిచేలా తోడ్పడింది. 

ఆమె దారుఢ్యం, ఎత్తూ చూసి అంతా ఆమెను పురుషుడనే అనుకొనేవారు. “నేను దున్నగలను, నాటగలను. పంటకోసి నూర్చి ధాన్యాన్ని యిల్లు చేర్చగలను. ఏ పురుషుడి సహాయమూ నాకవసరం లేదు. నేను స్త్రీని కానా మరి?” అంటూ ఆవేశంగా గొంతెత్తి స్పష్టం చేస్తుంది. స్త్రీలను కించపరిచే విధంగా మాట్లాడే మతాధికారుల్ని ఆమె నిలదీస్తూ “క్రీస్తు స్త్రీలకు హక్కులివ్వలేదని మాట్లాడుతున్నారు మీరు. ఎందుకంటే క్రీస్తు స్త్రీకాదు కనుక’ అంటుంది. 1840 ప్రాంతంలో సోజర్నర్  ఈ మాట అన్నది అనుకొంటే యివ్వాల్టి స్త్రీలకు కూడా ఉద్వేగం కలుగుతుంది. “తల్లకిందులుగా ఉన్న ప్రపంచాన్ని సరిగ్గా సరి చేస్తామని స్త్రీలు అడుగుతున్నారు. కాబట్టి వాళ్ళనా పని చేయనిస్తే మేలని నేననుకుంటున్నాను” అంటూ సభలో నిష్కర్షగా ప్రకటిస్తుందామె.
ఈ కధలో ‘అండర్ గ్రౌండ్ రైల్ రోడ్’ అనే పదం ఒక మాట ఉంటుంది అండర్ గ్రౌండ్ రైల్ రోడ్ అంటే భూమి అంతర్భాగాన రైల్వే ట్రాక్ అనో , రోడ్డు అనో కాదట. అమెరికాలో దక్షిణ రాష్ట్రాల నుండి ప్రతి సంవత్సరం వేలకొద్ది బానిసలు తప్పించుకొని పారిపోయి ‘ఫ్రీ స్టేట్స్’కి చేరేవాళ్లు. ఫ్రీ స్టేట్స్ అంటే బానిసత్వం లేని కొన్ని ఉత్తర రాష్ట్రాలు. ఈ పారిపోతున్న వాళ్ళను కనిపెట్టి వివిధ సురక్షిత ప్రాంతాలకు చేరవేసేవాళ్ళు కొందరు. ఎందరో మానవతావాదులు, వాళ్ళ ప్రాణాలకు తెగించి ఈ అండర్ గ్రౌండ్ రైల్ రోడ్ ని నిర్వహించారనీ, ఆశ్చర్యకరంగా యిందుకు తెల్ల జాతీయులెందరో కూడా సహకరించారని తెలిసి విస్మయం కలుగుతుంది. 

ఇలా ఒక స్థావరం నుండి మరో స్థావరానికి అంచెలంచెలుగా మార్చడమన్నది అంత తేలికైన విషయమేమీ కాదు. మిలటరీ వాళ్ళు వేటకుక్కలతో ప్రతిచోటా కాపలా ఉండేవాళ్లు. చిన్న పొరపాట్లకే కఠినమైన శిక్షలూ, జరిమానాలూ వుండేవి. ఈ వ్యవస్థలో పనిచేసిన ఎందరో ఇప్పటికీ చరిత్రలో శాశ్వతంగా నిలిచిపోయారు. అలా కెనడా చేరుకొన్న బానిసలకు ఎంతో స్వేచ్ఛ, విద్య, రక్షణ, పని లభించేవే. 
సోజర్నర్ పేరు అమెరికా అంతా వ్యాపించిపోయింది. ‘అంకుల్ టామ్స్ కాబిన్’ రచయిత్రి  ‘హరియట్ బీచర్ స్టవ్’ తెల్లజాతి మనిషి. ఆమె భర్త బానిసత్వ విమోచనోద్యమకారుడు. సోజర్నర్  ఆ నవలని ఎవరితోనో చదివించుకుని విని హరియట్ ని కలిసి అభినందనలు తెలిపినపుడు ఆమె గురించి చాలా విని వున్న రచయిత్రి  సోజర్నర్  ట్రూత్ ని కలుసుకోగలిగినందుకు ఆనందపడుతుంది. అలాగే అమెరికా పదహారో ప్రెసిడెంట్ అబ్రహాం లింకన్ ని కలిసి నల్ల జాతీయులకు మేలు చేసినందుకు కృతజ్ఞతలు తెలుపుతూ ‘మీరు ప్రెసిడెంట్ అయ్యేదాకా మీ పేరు విని వుండలేదు’ అంటుంది. అందుకు వెంటనే లింకన్ ‘నేను ప్రెసిడెంట్ కాక ముందు నుండే మీ పేరు విని ఉన్నాను. మీరు నాకు పరిచితులే’ అంటాడు. అంతేకాకుండా బానిసత్వాన్ని నిర్మూలించిన చేత్తో ‘ఫర్ ఆంటీ సోజర్నర్  ట్రూత్ ‘అని ఆటోగ్రాఫ్ ఇస్తాడు.
ఒక నిగ్గర్ అందునా ఒక స్త్రీ తన జీవితకాలంలోనే ఒక మహాత్మురాలిగా గుర్తింపునందుకున్న ‘మహాప్రస్థానం’ ఈ నవల. ఈ నవల, లేదా ఈ జీవిత చరిత్ర చదువుతున్నంత సేపూ ఎంతోమంది బానిసోద్యమకారుల జీవితాలు చరిత్రకెక్కాయి. కానీ ఈ సోజర్నర్ ట్రూత్ గురించి మనకెందుకు అందుబాటులోకి రాలేదు? కేవలం స్త్రీ అయినందువల్లేనా? ఆమె స్నేహితురాలు ఆల్బర్ట్ గిల్ట్ ఈ బానిసోద్యమకారిణి  జీవితాన్ని గురించి రాయకుండా వుండి ఉంటే, యర్రింగ్ టన్ అప్పుడా పుస్తకాన్ని ప్రచురించలేక పోయి ఉంటే ఆమె జీవితం ఎన్నటికీ చరిత్రకందేది కాదు. ముఖ్యంగా చేలూరి రమాదేవి ఈ గ్రంధాల ఆధారంగా ‘నల్లజాతి నిప్పుకణిక  సోజర్నర్ ట్రూత్’నవల మనకు అందించలేకపోయేది.
ఇది రాస్తున్న సమయానికి అమెరికా దక్షిణ రాష్ట్రాలలోని ప్రభుత్వ కార్యాలయాల మీద ఎగురుతున్న ‘కాన్ఫిగరేట్ జండాలను’ (బానిసత్వాన్ని సూచించే జండాలు)  దించివేయడం ముదావహం. 

(మాతృక మాసపత్రిక ఆగస్ట్ 2015 సౌజన్యం తో ) 

 నల్లజాతి నిప్పుకణిక  - సొజర్నర్‌ ట్రూత్‌
- రమాదేవి చేలూరు
ధర : రూ. 100/-
మొదటి ముద్రణ : డిసెంబర్ 2003 ; మహిళా మార్గం ప్రచురణలు, హైదరాబాద్
హెచ్ బి టి తొలి ముద్రణ : జూన్ 2015


పతులకు, వివరాలకు: 
హైదరాబాద్‌ బుక్‌ ట్రస్ట్‌,
ప్లాట్‌ నెం. 85, బాలాజీ నగర్‌,
గుడిమల్కాపూర్‌, హైదరాబాద్‌ - 500 006

ఫోన్‌ : 040 23521849 
ఇ మెయిల్ ఐ డి : hyderabadbooktrust@gmail.com

హైదరాబాద్‌ బుక్‌ ట్రస్ట్‌