మరో ప్రపంచపు పుస్తకాలు !

యూనియన్‌ ఆఫ్‌ సోవియట్‌ సోషలిస్ట్‌ రిపబ్లిక్స్‌' ...
సంక్షిప్తంగా 'సోవియట్‌ యూనియన్‌' ...
ఇంకా సంక్షిప్తంగా 'రష్యా' ...!

స్వర్గం ఎలా వుంటుందో తెలియకపోయినా
'భూతల స్వర్గం' ఇలా వుంటుందని చాటిచెప్పిన...
సకల దేశాలను, సమస్త మానవాళిని
నాలుగైదు దశాబ్దాలపాటు ఉత్తేజపరచిన, ఉర్రూతలూగించిన 'మరో ప్రపంచం' ...!!

'వసుధైక కుటుంబం' అన్న భావనను ఆచరణలోకి తెచ్చిన
తొలి సమసమాజ శ్రామికరాజ్యం ...!!

ప్రపంచ మానవుడంటే తనకి ఎంత ప్రేమో...
ప్రపంచ బాలబాలికలంటే తనకి ఎంత వాత్సల్యమో ...!
దేశదేశాల భాషల్లో మానవ విలువలను, విజ్ఞాన వికాసాలను పెంపొందించే పుస్తకాలను, ప్రత్యేకించి పిల్లలను అలరించే పంచరంగుల పుస్తకాలను ఎంత అందంగా ప్రచురించి
ఎంత సరసమైన ధరలకు అందించేదో ...!

ఆ రోజుల్లో సోవియట్‌ యూనియన్‌ ప్రచురించిన పుస్తకాలు లేని పుస్తక ప్రియుల ఇల్లు మన దేశంలో ఒక్కటి కూడా వుండేది కాదంటే అతిశయోక్తి కాదు.
తెలుగులో ప్రతియేటా స్థానిక ప్రచురణ కర్తలు ప్రచురించే కొత్త పుస్తకాలకంటే
సొవియట్‌ యూనియన్‌ నుంచి దిగుమతి అయ్యే కొత్త పుస్తకాలే ఎక్కువగా వుండేవి.

పుస్తక ప్రపంచంలో అదొక స్వర్ణ యుగం.

అనిల్‌ బత్తుల గారు ఆనాటి మధుర స్మృతులను తట్టిలేపుతూ
పుస్తకాభిమానుల కోసం
''సోవియట్‌ బుక్స్‌ ఇన్‌ తెలుగు''
అనే బ్లాగును ప్రారంభించారు.
ఎంతో శ్రమించి సేకరించిన సోవియట్‌ పుస్తకాలను స్కాన్‌ చేసి మరీ ఆ బ్లాగులో పొందుపరిచారు. ఒక్కసారి ఆ మరో ప్రపంచంలో విహరించండి.

నలుగురు కలిసి బ్లాగును వెబ్‌సైట్‌లా అభివృద్ధి పరిచి ఆ అపరూపమైన పుస్తకాలను పూర్తి స్థాయిలో ఈ తరానికి అందుబాటులోరకి తీసుకురాగలిగితే మరింత ఉపయుక్తంగా వుంటుంది.


http://sovietbooksintelugu.blogspot.in/

 

 

 

గ్రాన్ విల్ ఆస్టిన్ ఇక లేరు !

గ్రాన్ విల్ ఆస్టిన్ ఇక లేరు

భారత రాజ్యాంగం పై సాధికారత కలిగిన సుప్రసిధ్ధ రజ్యాంగ నిపుణులు గ్రాన్ విల్ ఆస్టిన్ (87) గత ఆదివారం (6 జులై 2014) న వాషింగ్టన్ డిసి లో మరణించారని తెలియజేయడానికి విచారిస్తున్నాము. వారు రాసిన ప్రపంచ ప్రఖ్యాత రచన ‘The Indian Constitution: Cornerstone of a Nation’ తెలుగు అనువాదాన్ని గత సంవత్సరం మే నెలలో "భారత రాజ్యాంగం - దేశానికి మూల స్తంభం" పేరిట హైదరాబాద్ బుక్ ట్రస్ట్ , నేషనల్ ట్రాన్స్ లేషన్  మిషన్ సం యుక్తంగా ప్రచురించిన విషయం విదితమే.
వారి మృతికి హైదరాబాద్ బుక్ ట్రస్ట్ ప్రగాఢ సంతాపాన్ని ప్రకటిస్తోంది.
వారి గురించి ఈరోజు ది హిందూ లో వెలువడిన వార్తా కధనం దిగువ పొందుపరుస్తున్నాము :

 Granville Austin, scholar of Indian constitution, passes away

Prof. Austin leaves behind him a treasured legacy of scholarly analysis on the Indian constitution, which he described as, “first and foremost a social document”.

“The Indians’ sense of their rich cultural heritage, their record of professional achievements in the arts and sciences of the modern world, and their faith in their ability to govern themselves, combined to give them a national maturity that allowed a reasoned approach to the creation and working of government.”

Thus wrote Granville Austin (87), renowned scholar of the Indian constitution and constitutional assembly debates, in his seminal tome, ‘The Indian Constitution: Cornerstone of a Nation.’

Professor Austin passed away in Washington, D.C., on Sunday, but he leaves behind him a treasured legacy of scholarly analysis on the Indian constitution, which he described as, “first and foremost a social document,” one that embodied the objectives of a “social revolution.”

Reviewing his work Upendra Baxi, Professor of Law in Development at the University of Warwick, United Kingdom, wrote that the volume, “provides the most comprehensive, insightful and balanced account of the work of the Constituent Assembly which drafted the Indian Constitution in the brief span of time from December, 1946 to December, 1949 – a time of strife, turbulence and ferment not merely in India but in the entire world.”

Including a second, seminal book, ‘Working a Democratic Constitution: The Indian Experience,’ Professor Austin’s definitive studies of constitution-making in India are said to have effectively displaced much of the pseudo-literature on the subject.

He writings have sometimes been cited by the Indian Supreme Court and are said to have significantly informed legal thinking, jurisprudence and the evolution of Indian constitutional law.

Born in 1927, Professor Austin lived in Norwich, Vermont, from the age of five. He went on to graduate from Dartmouth College with a BA in American Literature and then earned a doctorate in Modern Indian History from Oxford University.

Working as a journalist and photographer and later serving with the U. S. Information Service, Department of State, Department of Health, Education and Welfare, and on the staff of a U. S. senator, Professor Austin’s wide experience with public policy issues informed his subsequent scholarly projects.

In the latter arena he excelled and wide recognition followed, not least in the form of numerous fellowships and grants, including from St. Antony's College, Oxford, the Ford Foundation, the Fulbright Program, the American Institute of Indian Studies, the Rockefeller Foundation, the Woodrow Wilson International Centre for Scholars, the Rajiv Gandhi Foundation, and the Institute of Current World Affairs.

In 2011, in recognition for his writing on the framing and working of the Indian Constitution, Professor Austin was awarded a Padma Shri award, the fourth-highest civilian honour of India.

To his many friends and mentees, who described him as a “remarkable man,” he was known as ‘Red.’ Professor Austin is survived by his wife, Nancy, his four children, and three grandchildren. 

(Courtesy : The Hindu , July 8, 2014)

http://www.thehindu.com/news/national/granville-austin-scholar-of-indian-constitution-passes-away/article6186775.ece?homepage=true

జార్జిరెడ్డి 40వ వర్ధంతి సభ

ఏప్రిల్‌ 14న సాయంత్రం 6 గంటలకు సుందరయ్య విజ్ఞాన కేంద్రం, బాగ్‌లింగంపల్లి, హైదరాబాద్‌లో జార్జిరెడ్డి 40వ వర్ధంతి సభ

ఉస్మానియా యూనివర్సిటీ క్యాంపస్‌లో జార్జిరెడ్డి హత్య జరిగి 40 సంవత్సరాలైంది. జార్జిరెడ్డి సైన్స్‌ కాలేజీలో రీసెర్చ్‌ స్కాలర్‌గా గోల్డ్‌ మెడల్‌ సాధించిన అత్యున్నత ప్రతిభాశాలి. ఉస్మానియా యూనివర్సిటీలో విప్లవ వామపక్ష విద్యార్థి ఉద్యమాలకు పునాదులు వేసిన మూలపురుషుడు. ఆనాటి ''జీనాహైతో మర్‌నా సీఖో- ఖదం ఖదం పర్‌ లడ్‌నా సీఖో'' నినాదం అగ్గిరవ్వగా మారి అనేక విద్యార్థి ఉద్యమాలను వెలిగించింది.
ఆ యువనేతను స్మరించుకోడానికి, ఆనాటి వాతావరణాన్ని మనముందుంచడానికి, ఆయనతో కలిసి మెలిగిన మిత్రులు ఈ సభలో ఆయన విశిష్ట వ్యక్తిత్వాన్ని వివరిస్తారు.
- జార్జి మిత్రులు

హెచ్‌బీటీ ఘంటారావం - సాక్షి సాహిత్యం పేజీ

...
మేధస్సుకు పదును పెడుతూనే, విలువలకూ కళాదృష్టికీ ఆలవాలంగా ఉన్న పుస్తకాలను కొన్ని దశాబ్దాలుగా తెలుగు పాఠకుల ముందుకు తెస్తున్న హైదరాబాద్‌ బుక్‌ ట్రస్ట్‌ (హెచ్‌.బి.టి.) 2011 సంవత్సరంలో కూడా పుస్తకాల ఎంపికలో తనదైన శైలిని చూపింది.

ఈ సంవత్సరం అ లెగ్జాండర్‌ డ్యూమా విఖ్యాత నవల 'కౌంట్‌ ఆఫ్‌ మాంట్‌ క్రిస్టో' ను 'అజేయుడు' పేరుతో, విక్టర్‌ హ్యూగో నవల 'హంచ్‌బ్యాక్‌ ఆఫ్‌ నాట్ర్‌డేమ్‌' ను 'ఘంటారావం' పేరుతోనూ తెలుగులోకి తీసుకొచ్చారు. సూరంపూడి సీతారాం అనితర సాధ్యమనిపించే రీతిలో చేసిన అనువాదాలివి.

ఝల్‌కారీ బాయి కథకు అనువాదాన్ని కూడా ఈ సంవత్సరమే విడుదల చేశారు.

హెచ్‌బీటీ ప్రచురణల్లో ప్రత్యేకంగా చెప్పుకోవలసినవి డాక్టర్‌ కేశవరెడ్డి నవలలు.
ఆయన రాసిన 'స్మశానం దున్నేరు', 'ఇన్‌క్రెడిబుల్‌ గాడెస్‌', 'సిటీ బ్యూటిఫుల్‌', 'రాముడుండాడు-రాజ్యముండాది' నవలలను మళ్లీ వెలువరించింది హెచ్‌బీటీ.

వచ్చే సవత్సరం-
'ఇస్మత్‌ చుగ్తాయ్‌ కథలు',
రడ్యార్డ్‌ కిప్లింగ్‌ 'జంగిల్‌ బుక్‌',
విభూతి భూషణ్‌ బంధోపాధ్యాయ 'అపరాజితో',
దేవులపల్లి కృష్ణమూర్తి 'యాత్ర' నవలను
వెలువరించే ఆలోచనలో ఈ సంస్థ ఉంది.

- సాక్షి - సాహిత్యం 19 డిసెంబర్‌ 2011 సౌజన్యంతో

వావిళ్ల 'రాధికా సాంత్వనము'నకు నూరేళ్లు - రామతీర్థ

వావిళ్ల 'రాధికా సాంత్వనము'నకు నూరేళ్లు - రామతీర్థ


18వ శతాబ్దికి చెందిన ముద్దుపళని అనే ముగ్ధ జీవించింది కేవలం 21 ఏళ్లే.
దేవదాసీల ఇంటిలో జన్మించిన ఆమె తన 20వ యేటనే ''రాధికా సాంత్వనము'' అనే శృంగార కావ్యాన్ని రాసింది.
ఆ కావ్యం 1887 నాటికే సంప్రదాయ పండితుల నుంచి తీవ్ర నిరసనలను ఎదుర్కొంది.

కందుకూరి వీరేశలింగం పంతులు సైతం ఈ కావ్యాన్ని కటువైన పదజాలంతో ఖండించారు. కావ్య రచయిత్రిని 'ఇది', 'వేశ్యాంగన' అని సంబోధిస్తూ ఈసడించుకున్నారు.
''ఈ గ్రంథములోని భాగములనేకములు స్త్రీలు వినదగినవియు, స్త్రీ నోటి నుండి రాదగినవియు గాక దూష్యములయి యున్నవి. 'ఇది' జారత్వమే కులవృత్తిగా గల వేశ్యయగుటచేత స్త్రీ జన స్వాభావిక మయిన సిగ్గును విడిచి శృంగార రసమను పేర సంభోగాది వర్ణనలను పుస్తకము నిండ మిక్కిలి చేసినది'' అంటూ విమర్శించారాయన.

అనేక తాళ పత్ర గ్రంథాలను పరిష్కరించి తెలుగు సాహిత్యానికి ఎనలేని సేవ చేసిన సి.పి.బ్రౌన్‌ గారే ''రాధికా సాంత్వనము''ను కూడా కాపాడి ముందు తరాలకు అందించారు.
బెంగుళూరు నాగరత్నమ్మ (1878-1952) రాధికా సాంత్వనమును తొలిసారి 1910లో మద్రాసులోని వావిళ్ల వారి ద్వారా పుస్తకరూపంలో ప్రచురించారు. (ఈ యేడు ఆ పుస్తకానికి నూరేళ్ల పండుగ సందర్భం).

అయితే 1911లోనే ఈ పుస్తకం అశ్లీలత పేరిట ప్రభుత్వ నిషేధానికి గురైంది.
1947లో ప్రకాశం పంతులు మదరాసు రాష్ట్ర ముఖ్యమంత్రి అయిన తరువాత ఆ నిషేధాన్ని ఎత్తివేశారు. ''జాతి నగలోంచి జారిపోయిన ముత్యాలను తిరిగి చేర్చగలిగాము'' అన్నారు.
నిషేధం ఎత్తివేయగానే వావిళ్ల వారే రాధికా సాంత్వనమును తిరిగి ముద్రించారు.

ఇలాంటి విశేషాలను ఎన్నింటినో రామతీర్థ గారు తమ ''వావిళ్ల 'రాధికా సాంత్వనము'నకు నూరేళ్లు అనే వ్యాసంలో రాశారు. 

ఆంధ్ర జ్యోతి 27 12-2010 సోమవారం 'వివిధ'లో ప్రచురించిన ఆ వ్యాసాన్ని ఈ కింది 
లింకు లో చూడవచ్చు.

http://www.andhrajyothy.com/i/2010/dec/27-12-10vividha.pdf

మరిన్ని వివరాలకు ''బెంగుళూరు నాగరత్నమ్మ జీవిత చరిత్ర''ను చదవండి. 

.

వనవాసి, సూర్యుడి ఏడోగుర్రం నవలా రచయితలు

ప్రముఖ బెంగాలీ నవల ''అరణ్యక''ను 'వనవాస'ి పేరుతో,
ప్రముఖ హిందీ నవలిక ''సూరజ్‌ కా సాత్వా ఘోడా''ను 'సూర్యుడి ఏడో గుర్రం' పేరుతో ఈ మధ్యే హైదరాబాద్‌ బుక్‌ ట్రస్ట్‌ పునర్ముద్రించిన విషయం విదితమే.

ఆ నవలా రచయితల గురించి క్లుప్తంగా ...



బిభూతి భూషణ్‌ బంధోపాధ్యాయ:
1894లో కలకత్తాకు ఉత్తరంగా వందమైళ్ల దూరంలో వున్న మరాఠీపూర్‌ గ్రామంలో పుట్టిన బిభూతి భూషణ్‌ బంధోపాధ్యాయ బాల్యమంతా బీదరికంతోనే గడిచిపోయింది.
చదువు స్థానిక పాఠశాలలో సాగింది.
1918లో కలకత్తాలోని రిప్పన్‌ కాలేజీ నుండి డిగ్రీపొందారు.
మధ్య మధ్యలో రకరకాల వృత్తులు చేసినా ఎక్కువ భాగం మాత్రం ఉపాధ్యాయుడిగానే కొనసాగిన ఆయన తొలి కథ 1922లో కలకత్తా జర్నల్‌లో ప్రచురితమైంది.
అప్పటి నుంచీ రచనా వ్యాసంగాన్ని కొనసాగిస్తూ 17 నవలలు, 20 కథా సంకలనాలతో సహా 50 వరకూ పుస్తకాలు ప్రచురించారు. ఆయన విఖ్యాత రచన, ఆయనకు గొప్ప కీర్తిని ఆర్జించి పెట్టిన రచన ''పథేర్‌ పాంచాలీ''. దీనికి కొనసాగింపుగా రాసింది ''అపరాజిత''. వీటిని ప్రముఖ దర్శకులు సత్యజిత్‌ రే చలనచిత్రాలుగా మలచి ప్రపంచ ప్రఖ్యాతిని పొందారు.
దట్టమైన ప్రకృతితో మమేకమై అంతరించిపోతున్న అరణ్యాల గురించి మనసులకు సునిశితంగా హత్తుకునేలా రాసిన అరణ్యక (వనవాసి) బిభూతి భూషణ్‌ బంధోపాధ్యాయ విశిష్ట రచనగా విణుతి కెక్కింది.
ఆయన 1950లో మరణించారు.

ధర్మవీర్‌ భారతి:
హిందీ సాహితీరంగంపై బలమైన ముద్రవేసిన విశిష్ట రచయిత ధర్మవీర్‌ భారతి.
1926 లో అ లహాబాద్‌లో జన్మించారు.
కవిగా, నాటక రచయితగా, నవలాకారుడిగా, విమర్శకుడిగా హిందీ సాహిత్యంలో ఆధునిక పోకడలను ప్రవేశపెట్టిన ఘనత ఆయనది.
ఆయన రచించిన ''గునహోంకా దేవతా'' భారతీయ సాహిత్యంలో ఎన్నటికీ నిలిచిపోయే క్లాసిక్‌. మహాభారత యుద్ధం పరిసమాప్తమైన ఆఖరి రోజు పరిణామాలను సమకాలీన దృక్పథం నుంచి విశ్లేషిస్తూ రాసిన నాటకం ''అంధయుగ్‌'' భిన్న తరాలకు చెందిన ప్రయోక్తల సారథ్యంలో దేశవ్యాప్తంగా ఇప్పటికి కొన్ని వేలసార్లు ప్రదర్శితమైంది.

శైలీపరంగా ఓ అసాధారణ ప్రయోగం ''సూరజ్‌కా సాత్వా ఘోడా'' (సూర్యుడి ఏడో గుర్రం).

అ లహాబాద్‌ విశ్వవిద్యాలయం నుంచి హిందీ సాహిత్యంలో ఎంఎ. పట్టా తీసుకున్న ధర్మవీర్‌ భారతి 1950లలో విస్తృతంగా రాశారు.
హిందీ అధ్యాపకుడిగా పనిచేశారు.
1960 నుంచీ 1987 వరకూ ప్రముఖ హిందీ వార పత్రిక ''ధర్మయుగ్‌'' కు ప్రధాన సంపాదకుడిగా వ్యవహరించారు.
పద్మశ్రీతో సహా పలు అవార్డులు అందుకున్నారు. ఆయన 1997లో గుండెపోటుతో మరణించారు.

సూరజ్‌ కా సాత్వా ఘోడా నవలను 1992 లో ప్రముఖ దర్శకుడు శ్యాం బెనెగల్‌ అదే పేరుతో హిందీలో చలన చిత్రంగా తీశారు. ఆ చిత్రానికి వివేష ప్రజాదరణతో పాటు జాతీయ అవార్డు లభించింది.

Soorampoodi SitaRam

''బ్రాహ్మణ కులం దేవతల నుంచి, శూద్రకులం అసురుల నుంచి పుట్టాయి.''

దశావతారాలు పుస్తకంపై వచ్చిన విమర్శకు డా.విజయభారతి గారి వివరణ.

పురాణాలు కులవ్యవస్థ:2, దశావతారాలు పుస్తకంపై వెంకటరమణ గారు గత ఏప్రిల్ లో ఈ కిందివిధంగా కామెంట్‌ చేశారు. (పుస్తక పరిచయం కోసం ఇక్కడ నొక్కండి.)

>>>>>''అసురులు'' అంటే రాక్షసులు అని అర్థం. శూద్రులు అని నేను ఎప్పుడూ వినలేదు. మీరు చెప్పినదాన్ని బట్టి శూద్రులందరూ రాక్షసులు అని అర్థం వస్తుంది. దీనికి మీ వివరణ ఏమిటి? దయచేసి మీ ఇష్టం వచ్చిన అర్థంతో వ్రాసి విద్వేషాలను పేన్చకండి.

దశావతారాలలో డార్విన్‌ సిద్ధాంతాన్ని వెతికిన వారిని చూశాను కానీ, ఇలా కులతత్వాన్ని వెతికిన వారిని చూడటం ఇదే మొదటిసారి. విజయభారతి గారి నూతన కోణానికి వందనాలు.<<<<<<

దీనిపై డా.విజయ భారతి గారు యిచ్చిన సమాధానమిది.
కొంత ఆలస్యమైనందు వల్ల ఇక్కడ విడిగా పొందుపరుస్తున్నాము. :

'' బ్రాహ్మణ కులం దేవతల నుంచి, శూద్రకులం అసురుల నుంచి పుట్టాయి'' అని మూయిర్‌ సంస్కృత గ్రంథాలు 1, పుట.12 ఆధారంగా డా|| బి.ఆర్‌ అంబేడ్కర్‌ చెప్పారు (చూ. డా|| అంబేడ్కర్‌ ప్రసంగాలు
తెలుగు అనువాదం సంపుటి 4.పే 273).

కులవ్యవస్ధ ఆవిర్భావం గురించి పురాణాలలోనూ బ్రాహ్మణాలలొనూ ఉన్న ఎన్నెన్నో కధనాలు చెబుతూ ఆయన పై దాన్ని కూడా చెప్పారు.

'అసుర' పదాన్ని మొదట్లో దేవ, దానవ, దైత్య జాతులన్నింటికీ కలిపి వాడేవారు. వరుణుడు, సూర్యుడు మొదట్లో అసురులు గానే వేద మంత్రాలలొ పేర్కొనబడ్డారు. తర్వాతి కాలంలో వేర్వేరు అర్థాలలో ఈ పదాలు వాడారు. ప్రత్యేకించి నాగులనూ, యక్షులనూ రాక్షసులుగా పేర్కొన్నారు.

తెలుగుమాట్లాడే ప్రాంతాలలోనివారంతా నాగజాతి వారనీ, వారిని రాక్షసులుగా పిలిచేవారనీ హిస్టరీ కాంగ్రెస్‌ వారి పరిశీలనలు తెలుపుతున్నాయి. పురాణాలలో వీరిని దేవ బ్రాహ్మణ వర్గాలు తమకంటే తక్కువ వారిగా అద్విజులుగా చూశారు. కులవ్యవస్ధలో మనువు శూద్రులకు ఉపనయనం వంటి సంస్కారాలు చెప్పలేదు. వారు అద్విజులే. ద్విజ, అద్విజ భేదాలు అనంతర కాలంలో ఏర్పడ్డాయి .

ఆంధ్రులు/తెలుగువారు నాగ జాతీయులు, వారిని రాక్షసులు అనేవారు అని ఆంధ్రప్రదేశ్‌ హిస్టరీ కాంగ్రెస్‌ వారు నిర్ధారించారు.

- విజయభారతి


......

ఏడాదిలో 10,000 హిట్లు ... !

హైదరాబాద్ బుక్ ట్రస్ట్ బ్లాగును ప్రారంభించి దాదాపు 14 నెలలు కావస్తోంది.
అయితే వీక్షకుల సంఖ్యను తెలిపే క్లస్టర్ మాప్ ను ఇన్సర్ట్ చేసి మాత్రం సరిగ్గా సంవత్సరం అవుతోంది.
గత 14 ఆగస్ట్ 2008 నుంచి ఇవాళ్టి వరకు 10,000 కు పైగా హిట్లను సూచిస్తోంది అది .
మా బ్లాగును ఇంతగా అభిమానిస్తున్న పుస్తక ప్రియులందరికీ ఈ సందర్భంగా కృతఙ్ఞతలు తెలియజేసుకుంటున్నాం.
మేం ప్రచురించిన పుస్తకాలపై వివిధ పత్రికల్లో, బ్లాగుల్లో వెలువడిన (మా దృష్టికి వచ్చిన ) సమీక్షలను మా బ్లాగులో తిరిగి పొందుపరుస్తున్న విషయం తెలిసిందే.
మంచి పుస్తకాల ప్రచురణకూ, వాటి ప్రాచుర్యానికీ ఈ సమీక్షలు ఎంతగానో దోహదం చేస్తున్నాయి.
ఇకనుంచీ మా పుస్తకాలను చదివిన పాఠకులు ఎవరైనా సరే తమ అభిప్రాయాన్ని, స్పందనను, సమీక్షను మాకు నేరుగా మెయిల్ చేస్తే వాటిని కూడా మా బ్లాగులో పొందుపరచాలని అభిలషిస్తున్నాం.
ఇదే మీకు మా ఆహ్వానం.
రండి మంచి పుస్తకాలు విరివిగా వెలువడేందుకు మీ వంతు సహకారం అందించండి..
మా పాఠకులకూ, బ్లాగు వీక్షకులకూ, సమీక్షకులకూ, కూడలి, జల్లెడ, హారం లకూ మా హృదయపూర్వక ధన్యవాదాలు.
ఇట్లు
మీ
హైదరాబాద్ బుక్ ట్రస్ట్

ఈమెయిలు చిరునామా : hyderabadbooktrust@gmail.com

,,,,,,,,,,,,,,,,,,,,,

ఊరు వాడ బతుకు పుస్తకావిష్కరణ సభ జూలై 17, 2009 న హైదరాబాద్ ప్రెస్ క్లబ్ లో ...

దేవులపల్లి కృష్ణమూర్తి రచించిన " ఊరు వాడ బతుకు " పుస్తకాన్ని

హైదరాబాద్ బషీర్ బాగ్ ప్రెస్ క్లబ్ లో
జూలై 17 శుక్రవారం సాయంత్రం 6 గంటలకు


ప్రముఖ సినీ దర్శకులు శ్రీ బి. నరసింగ రావు
ఆవిష్కరిస్తున్నారు.

అధ్యక్షత : శ్రీ నోముల సత్యనారాయణ

ముఖ్య అతిధి : శ్రీ జయధీర్ తిరుమల రావు

వక్తలు : శ్రీ గుడిపాటి , శ్రీ ఎ కే ప్రభాకర్

ప్రచురణకర్తల అభిభాషణ : గీతా రామస్వామి , హైదరాబాద్ బుక్ ట్రస్ట్

అందరికీ ఇదే మా ఆహ్వానం

మిత్రులారా ఇక సెలవు ... ఇట్లు ఒక రైతు ...

గొర్రెపాటి రవీంద్ర నాధ్ మృతికి సంతాపం ...

సేంద్రీయ వ్యవసాయం లో అనేక ప్రయోగాలు, రైతు సమస్యలపై ఎనలేని పోరాటాలు చేసి తన అనుభవాల సారాన్ని "ఇట్లు ఒక రైతు" అనే పుస్తక రూపం లో మనకు అందించిన గొర్రెపాటి నరేంద్రనాథ్ 5 జూలై 2009 ఆదివారం తుది శ్వాస విడిచారు.

గత రెండు సంవత్సరాలనుంచీ వారు బ్రెయిన్ ట్యూమర్ తో బాధపడుతున్నారు. తను మరెంతో కాలం జీవించనని, తను మరణించే లోపు "ఇట్లు ఒక రైతు" ను తీసుకు రావాలని చివరి రోజుల్లో వారు ఎంతో ఆరాటపడేవారు. మేము ఆ పుస్తకాన్ని సకాలంలో ప్రచురించి, ఆవిష్కరించినప్పుడు ఆయన ఎంతగానో సంతోషించారు. నరేంద్రనాథ్ కు వ్యవసాయ మన్నా , ప్రజా ఉద్యమాలన్నా ఎనలేని మక్కువ. సేంద్రీయ వ్యవసాయ ప్రాధాన్యతను, వ్యసాయ రంగంలోని సాధక బాధకాలను, పల్లె జీవితం లోని ఒడిదొడుకులను చిత్రించిన ఇట్లు "ఒక రైతు" చిరకాలం అయన స్మృతి/కృషి చిహ్నంగా నిలిచివుంటుంది.

ఆయన మృతికి హైదరాబాద్ బుక్ ట్రస్ట్ ప్రగాఢ సంతాపాని తెలియజేస్తోంది.



ఆంధ్ర జ్యోతి వార్త:
........










నరేంద్రనాథ్ గురించి మరింత తెలుసుకునేందుకు ఈ పోస్టులు చదవండి :

నేషనల్ అలయన్స్ ఫర్ పీపుల్స్ మూవ్ మెంట్స్ (NAPM) నివాళి :
http://aravinda.aidindia.org/?p=181

గడ్డి పరక విప్లవం ( బ్లాగు గుండె చప్పుడు )
http://hridayam.wordpress.com/2009/05/19/one-straw-revolution/

ఒక గొప్ప రైతు అస్తమయం ( బ్లాగు గుండె చప్పుడు )
http://hridayam.wordpress.com/2009/07/07/gorrepati-narendranath-passes-away/#more-718

నరేంద్ర నాథ్ వున్నాడు (నారాయణీయం బ్లాగు )
http://naaraayaneeyam.blogspot.com/2009/07/blog-post.html

”నేను మేధావుల మధ్యన సెక్స్‌ వర్కర్‌ని”…. నళినీ జమీలాతో జె.దేవిక ఇంటర్వ్యూ … భూమిక సౌజన్యంతో ...

భూమిక తెలుగు స్త్రీవాద పత్రిక జూన్ ౨౦౦౯ సంచిక లో ప్రచురించబడ్డ ఈ ఇంటర్వ్యూని మాబ్లాగు సందర్శకుల సౌకర్యార్థం తిరిగి ఇక్కడ యదాతధంగా పొందుపరుస్తున్నాము. భూమిక వారికి మా కృతజ్ఞతాభినందనలు
భూమిక కోసం ఇక్కడ క్లిక్ చేయండి

”నేను మేధావుల మధ్యన సెక్స్‌ వర్కర్‌ని”….

మీ ఆత్మకథ మలయాళంలో వెలువడిన తర్వాత, ”ఇప్పుడిక నళిని సెక్స్‌ వర్కర్ల మధ్యన ఓ మేధావి అన్నమాట” అంటూ ఎవరో ఓ కామెంటు చేశారు. ”లేదు నేను మేధావుల మధ్యన సెక్స్‌ వర్కర్‌ని”అని మీరు ప్రతిస్పందించారు. దీన్ని కొంచెం వివరిస్తారా?

అలాగే. నన్ను అవమానించాలని ఉద్దేశ్యపూర్వకంగా కొందరు చేసిన వ్యాఖ్యలకు నా ప్రతిస్పందన అది. కొన్నాళ్ళ కిందట నేనో షార్ట్‌ ఫిల్మ్‌ తీసిన విషయం మీకు గుర్తుండే ఉంటుంది. ”ఈ సినిమాను ఓ సెక్స్‌ వర్కర్‌ తీసిందట.” అంటూ మాట్లాడుకున్నారు చాలామంది. ”అక్షరజ్ఞానం లేని పల్లెటూరి మనిషి సినిమా తీసింది ” అని కూడా చర్చించుకున్నారు. కనీసం ”ఓ స్త్రీ తీసిన సినిమా” అనే పద్ధతిలో కూడా లేవామాటలు. అంటే నేనొక సెక్స్‌ వర్కర్‌ను మాత్రమేననీ, అలాగే ఉండాలనీ వాళ్ళు నొక్కి చెప్తున్నారన్నమాట. ఆ మాటల్ని వాళ్ళకే అప్పచెప్దామన్పించి అలా మాట్లాడాను.

మలయాళంలో నా పుస్తకం వచ్చాక దాని మీద ఇలా ముద్ర వెయ్యాలని చాలా ప్రయత్నించారు. కేరళ రాష్ట్రంలో ఈ ప్రయత్నం మరింత ఎక్కువగా జరిగింది.కొన్ని చోట్ల నా పుస్తకానికి మంచి గౌరవం లభించింది.మైసూరులోనూ, ఆంధ్రప్రదేశ్‌లోనూ ఇటీవల నేను కొన్ని కార్యక్రమాల్లో కలిసి పనిచేశాను. వాటిలో పాల్గొన్న డాక్టర్లతో సమానంగా నన్నూ గౌరవంగా చూశారు. నేను ఓ సెక్స్‌వర్కర్‌గా వుంటూ జ్వాలాముఖి సంస్థలో మాత్రమే పని చేస్తుండిన రోజుల్లో చాలామంది నాతో బాగానే ఉండేవాళ్ళు. నేను అప్పట్లో ఇతరులను ”సహాయం” అడగాల్సిన స్థితిలో ఉన్న స్త్రీని అని. అలా వాళ్ళ సహాయ, సహకారాలకోసం దేబిరిస్తూ ”రక్షించండి, సాయం చెయ్యండి”అని పాకులాడినన్నాళ్ళూ వాళ్ళు నాపై ఔదార్యాన్ని కురిపించారు. ఎప్పుడయితే నాకంటూ ఓ స్వంత వ్యక్తిత్వాన్ని నిర్మించుకుని, అందరి సహాయాలూ అర్ధించడం మానేశానో - ఆ క్షణం నుంచీ నా మీద కురిసే దయా ప్రవాహం ఇంకిపోయింది. సరిగ్గా చెప్పాలంటే నిస్సహాయమైన నా రోదన వాళ్ళకు గొప్ప కిక్‌ ఇచ్చేదన్నమాట.నేను నా ఏడుపులు ఆపేసి వాళ్ళ ఆనందానికి భంగం కలిగించటం వాళ్ళు భరించలేకపోయారు! నేనలా ఏడుస్తూ ఉంటే, వాళ్ళంతా నన్ను రక్షించటానికి ముందుకొచ్చేవాళ్ళు - కానీ అది ఇంత త్వరగా ముగిసిపోయింది, పాపం.

ఒకప్పుడు నాకెంతో సన్నిహితంగా ఉండిన వాళ్ళలో చాలామంది, ఇప్పుడు దూరంగా పారిపోయారు. అందుకు నేనేమీ బాధపడటం లేదు. వాళ్ళ భయం చూస్తుంటే సరదాగా ఉంటుందంతే! మరో చిత్రమైన ప్రశ్నకూడా నాకు తరచుగా ఎదురవుతూ ఉంటుంది. నాతోటి సెక్స్‌వర్కర్ల బాధామయగాధలెన్నో ఉండగా పుస్తకం రాయటానికి నా ఆత్మకథనే ఎందుకు ఎంచుకున్నానని అడుగుతూ ఉంటారు. రెండు తప్పుడు అభిప్రాయాలు ఈ ప్రశ్నలో ఇమిడి ఉన్నాయి. మొదటిది-నేను ఇతర సెక్స్‌వర్కర్ల గురించీ, వాళ్ళ దుర్భర జీవితాల గురించి రాసి ఉండాల్సిందనీ- అందులో బాగంగానే నా కష్టాలను కూడా రాసుకోవాల్సిందనీ వాళ్ళ అభిప్రాయం.”ఇది కేవలం నా కథ కాదు అంతకన్నా లోతైనది-ఆత్మకథ” అని జవాబిచ్చాను. ఈ సమాధానంతో వాళ్ళు హతాశులయ్యారు. ఎందుకంటే ‘రక్షించండి!రక్షించండి!” అంటూ ప్రాధేయపడిన స్త్రీ స్వరం కాదిది!

ఇక రెండో విషయానికొస్తే - సెక్స్‌ వర్కర్‌గా పనిచెయ్యటంలో నాకసలే బాధాలేనట్టుగా ఈ పుస్తకంలో వస్తోందట! ఎంత పకడ్భందీగా వ్యూహం పన్నారో చూశారా?

మలయాళంలో వచ్చిన మీపుస్తకాన్ని చదువుతుంటే నేనో విషయాన్ని గమనించాను. మీ గత జీవితానుభవాలను వర్తమానకాలంలోకి తెచ్చిన శైలిని వాడారు. ఎందుకలా?

నా జ్ఞాపకాలను నేను నెమరువేసుకున్న పద్ధతే ఆ శైలిని రూపొందించిందను కుంటాను. నా మనసులో ముద్రించుకు పోయిన అనుభవాలను సినిమాలో దృశ్యాలను లాగా కళ్ళ ముందుకు తెచ్చుకుంటూ ఈ పుస్తకం రాశాను. మా నాయనమ్మ నేలమీద పాకుతూ వస్తున్న దృశ్యం నా జ్ఞాపకాల సంపుటిలో మొట్టమొదటిది. ఆమె అలా దేకుతూ వుంటే పొడుగ్గా సాగిన ఆమె చెవి తమ్మెలు కదులుతూ వుండటం కూడా ఇప్పటికీ నా కళ్ళముందు ఉంది. నా జీవితంలో ప్రతి అడుగునా ఓ పోరాటం చెయ్యాల్సి రావటంకూడా ఈ జ్ఞాపకాలు నాలో సజీవంగా ఉండటానికి కారణం కావచ్చు. జీవితపు ప్రతి దశలోనూ ఆగి వెనక్కి చూసుకుంటే నేను దాటివచ్చిన ప్రమాదాల అగాధాలు కనబడుతూనే వుంటాయి. ఇంతకాలం ఎలా బతికి ఉన్నాననా అని ఆశ్చర్యం వేస్తుంది ఒక్కోసారి. జీవితాన్ని అతి తరచుగా సమీక్షించుకుంటూ, నెమరు వేసుకుంటూ ఉండే లక్షణం వల్లనే నా జ్ఞాపకాలను ఇంత స్పష్టంగా పదిల పరచుకోగలిగానని కూడా అన్పిస్తుంది.

నా ఈ జీవితాలనుభవాల స్మృతులే గడ్డుకాలంలో నాకు గొప్ప ధైర్యాన్నిచ్చాయి. పెద్ద సమస్య ఎదురైనప్పుడల్లా ఓ క్షణం ఆగి గత అనుభవాలను తలుచుకుంటాను. ఇన్ని సమస్యల్ని దాటి వచ్చినదాన్ని ఇప్పుడింతగా భయపడాలా? అని ప్రశ్నించుకుంటాను.ఇన్ని ఇబ్బందులు మోయగలిగినదాన్ని అమ్మగా, అమ్మమ్మగా నా కర్తవ్యాలను, నేరవేర్చినదాన్ని ఎందుకింత భయపడాలని నాకు నేనే ధైర్యం చెప్పుకుంటాను. నా తోటి స్త్రీలతో మాట్లాడి, వాళ్ళ బాధల్ని విన్న తర్వాత నా గత జీవితానుభవాలనూ, ఎదుర్కొన్న సమస్యలనూ మలచుకోవటం నాకు గొప్ప శక్తి నిస్తుంది.

నా ఆత్మకథను గురించి కొందరు లేవనెత్తుతున్న మరొక అభ్యంతరం ఏమిటంటే - ఈ పుస్తకంలో వినబడుతున్నది నా అసలైన గొంతుకాదనీ, ‘క్లయింట్లు’లాంటి పదాలను వాడటం నా చైతన్య స్థాయిని మించినదనీ, ఈ పదం ఇటీవలనే వాడుకలోకి వచ్చిందనీ, నేను నా గతాన్ని చెప్పేటప్పుడు కూడా దాన్ని వాడటం అసహజమని వాళ్ళ వాదన. ఆ అభిప్రాయం సరైందికాదని నేనంటాను. సెక్స్‌ వర్కర్ల హక్కుల గురించి చైతన్యం మొదలవని రోజుల్లో కూడా మేము ”క్లయింట్లు” అనే మాటను మరో ఉద్దేశ్యంతో వాడుతుండే వాళ్ళం. మా వృత్తి ఏమిటన్నది బయట పడకుండా ఉండేందుకు ఉపయోగించే సంకేత భాషలో ఈ పదాన్ని సెక్స్‌ వర్కర్లు ఎప్పటినుంచో వాడుతూ ఉన్నారు. ఇటీవలి కాలంలో ఆ మాటను వాడటం సత్యాన్ని దాచటమనే ప్రయోజనంకోసం కాదు.

మీరు అత్తావారింట్లో ఎదుర్కొన్న సమస్యలకూ-సెక్స్‌వర్కర్‌గా మారటానికీ మధ్యనున్న సంబంధాన్ని మీరెలా అర్ధం చేసుకుంటున్నారు?

నిజం చెప్పాలంటే ఆ విషయాలను గురించి నేనంత లోతుగా ఆలోచించనే లేదు. డబ్బుకోసం ఓ మగవాడితో వెళ్ళటం, అతను ఎంతో కొంత ఇవ్వటం- అంతటితో కథ ముగిసేది. ఈ వృత్తిని జీవనోపాధిగా మార్చుకోవాలని అనుకోలేదు-కానీ తప్పనిసరైంది. ఓ సారి ఇందులోకి దిగాల్సిన పరిస్థితంటూ వచ్చాక , ఎదురయ్యే కష్ట నష్టాలను ధైర్యంగా ఎదుర్కోవటానికే సిద్ధపడ్డాను.

ఈ సమస్యలను ఏదో ఒకనాటికి దాటగలమని నాకు విశ్వాసం ఉంది. ఎంతో అందమైన యువతులు ఈ వృత్తిలోకి వచ్చాక అపరాధ భావంతో కుంగిపోతూ దుర్భరమైన జీవితాలు గడపటం చూస్తున్నాను. దానివల్ల వాళ్ళు మరింత దోపిడీకి గురౌతున్నారు. వాళ్ళకు నేనిచ్చే సలహా ఒకటే- ఏ కారణాల వల్లనైనా కావచ్చు. ఒకసారి వృత్తిలోకి అడుగుపెట్టటమంటూ జరిగిపోయాక ధైర్యంగా నిలబడాలి. నీ మీద నువ్వు జాలి పడటం మానేసి ”నాకు సంబంధించిన వాస్తవం ఇదీ” అని గుర్తుంచుకోవాలి.

ఈ వృత్తి నా దినసరీ జీవితంలో ఎన్నో మార్పులు తెచ్చింది. అంతకుముందు కూడా నా జీవితంలో సుఖాలూ, సంతోసాలూ ఏమీ లేవు. దిన దిన గండంగా బతుకుతూ వుండడంతో నా మీద నాకే శ్రద్ధ లేకుండా తయారయ్యాను. ఈ వృత్తిలోకి వచ్చాక నా శరీరం మీద శ్రద్ధ తీసుకోవటం తప్పనిసరి అయింది. మంచి బట్టలు కట్టుకుని హూందాగా తయారవటం నాలో ఓ రకమైన ఆత్మవిశ్వాసాన్ని నింపింది. ఇలా ఆకర్షణీయంగా తయారవటమనేది మగవాళ్ళను శారీరకంగా ఆకట్టుకోవటానికి మాత్రమేనని నేనెప్పుడూ భావించలేదు. కానీ నాకు నేను ధైర్యంగా, హుందాగా ఉండటంవల్ల మగవాళ్ళు నన్ను తేలిగ్గా చూడటానికి ‘సంకోచిస్తారన్నది నా అనుభవంలో తేలిన విషయం.

కంపెనీలో పనిచేస్తున్నప్పుడు పొద్దున్నే లేచి స్నానం చేసి శుభ్రంగా తయారవటమనేది ఓ తప్పనిసరి నిబంధనగా అలవాటయింది. తర్వాత కాలంలో హోటళ్ళలోనూ, యాత్రా స్థలాల్లోనూ క్లయింట్లను కలుసుకోవాల్సిన సందర్భాల్లో కూడా ఇదే దినచర్యను పాటించేదాన్ని. ఉదయం ఐదింటికల్లా హోటలు గదినుండి గుడికి వెళ్తున్నట్టుగా తయారై బయటకి రావాల్సుంటుంది. కాబట్టి వేకువనే లేచిసిద్ధమయేదాన్ని.

నేను సెక్స్‌ వర్కర్‌గా మారకముందు ఎంతో సన్నితంగా ఉండిన స్నేహితురాళ్ళతో తర్వాతకాలంలో స్నేహాన్ని కొనసాగించటం చాలా ఇబ్బందిగా తయారైంది. వాళ్ళ భర్తలు అందుకు ఇష్టపడేవాళ్ళుకాదు. ఐనా నా స్నేహితురాళ్ళు ఏ సినిమాకో టౌనుకు వచ్చినపుడు నన్ను కలిసి మాట్లాడేవాళ్ళు. ఈ వృత్తి మానెయ్యమని కూడా చెప్పేవాళ్ళు. నాకు దూరమవుతున్నామన్న బాధతోనే వాళ్ళామాట చెప్తారని నాకు తెలుసు. మగవాళ్ళ కారణంగా నేను పడిన బాధలకు నా స్నేహితురాళ్ళు దిగులు పడేవాళ్ళు. భర్తలతో వాళ్ళు పడుతున్న బాధలను కూడా నాతో చెప్పేవాళ్ళు, ఆ భర్తలకూ, ఈ క్లయింట్లకూ పెద్ద తేడా కనబడేదికాదు, అదే చెప్పి, నా కోసం బెంగ పడొద్దని ఓదార్చే దాన్ని.


మీరు ఈ వృత్తికి వచ్చిన రోజుల్లో దేశంలో ఎమర్జెన్సీ కొనసాగుతోంది కదా! ఆ రోజుల్లో మీకెదురైన ప్రత్యేకమైన సమస్యలేమయినా ఉన్నాయా?కొందరు పోలీసుల గురించి మీ ఆత్మకథలో ప్రస్తావించారు కదా?

ఎమర్జెన్సీ కాలంలో నాకెదురైన మొదటి అనుభవం చెప్తాను-ఆ రోజు నేను పోలీసు స్టేషన్లో నిలబడి వున్నాను. పోలీసుల ఆధీనంలో ఉన్న బందీలను చూట్టానికి వాళ్ళ బంధుమిత్రులు చాలామంది గుంపులుగా తోసుకుని వచ్చారు.పోలీసులు వాళ్ళపై విరుచుకుపడి విచక్షణా రహితంగా కొట్టారు. మొదటిసారి అరెస్టు చేసినపుడు నాతో చాలా దురుసుగా ప్రవర్తించటంతో భయపడి పోయాను. ఐతే రెండోసారి పుతుకాడ్‌ పోలీసులు అరెస్టు చేసినప్పుడు నాకు పోలీసుల గురించి బాగా అర్ధమయింది. సాధారణ ప్రజలను భయభ్రాంతులను చెయ్యటానికి వాళ్ళెంత మొరటుగా ప్రవర్తిస్తారో కళ్ళారా చూశాను.

పుతుక్కాడ్‌ పోలీస్‌స్టేషన్‌లో ఓ పోలీస్‌ అధికారి చాలా దుర్మార్గుడని నేను అప్పటికే విన్నాను. నన్ను ఎంత హింసిస్తారోనని బాగా భయపడ్డాను. మొదటిసారి దెబ్బలు తిన్నప్పుడే ఓ విషయం నాకు అర్ధమయింది. పోలీసులు మా క్లయింట్లుగా ఉంటే ఈ ఇబ్బందులు తగ్గుతాయని తెలుసుకున్నాను. పోలీసుల్లో ఎవరిస్థాయిని బట్టి వాళ్ళకు అధికారాలుంటాయి. కొందరు కిందస్థాయి పోలీసులక్కూడా వాళ్ళ పై అధికారుల ದగ్గరబాగానే చనువుంటుంది. అలాంటి కొందరిని నాకు మద్ధతుగా సంపాదించుకోగలిగాను. పుతుక్కాడ్‌ స్టేషన్లో నాకు పరిచయస్థుడైన ఓ పోలీసు ఉండటంతో సులభంగా బయట పడగలిగాను.

నన్ను వదిలిపెట్టాలంటే నాకు బంధువైనా మగవాడెవరయినా హామీ ఇవ్వాలని ఆ రోజు సర్కిల్‌ ఇన్‌స్పెక్టర్‌ షరతు పెట్టాడు.నా క్లయింటుగా ఉన్న పోలీసాయనే ఆ గండం నుంచి గట్టెక్కించాడు. తనకు తెలిసిన ఓ ప్యాక్టరీ సూపర్‌వైజర్‌ను నాకు అన్నయ్యగా ప్రవేశపెట్టాడు. ఆ రోజుల్లో మాలాంటి వాళ్ళు పోలీసు స్టేషన్‌ నుంచి క్షేమంగా బయటకి రావటమంటే పెద్ద ఘనకార్యం చేసినంత పనిగా ఉండేది.

సెక్స్‌వర్కర్లకూ, ఇతర స్త్రీలకూ మధ్యన సమాజం నిర్మించే నైతికమైన సరిహద్దులను గురించి మీ పుస్తకంలో చర్చించారు. జీవనోపాధి కోసం ఇతర పనులు చేసే స్త్రీలకూ, సెక్స్‌ వర్కర్లకూ తేడా లేదనటం సమంజసమేనా?

మనుషులు పొట్ట పోసుకోటానికి ఎన్నో రకాల పనులు చేస్తున్నారు. ఇల్లు గడపటానికి, వృద్ధుల అవసరాలనూ, పిల్లలపోషణనూ చూసుకోటానికీ-ఆడవాళ్ళు ఎంతగానో సతమతమవుతున్నారు. డబ్బున్న ఆడవాళ్ళకయితే ఆర్ధికమైన ఇబ్బందు లుండవు మాకున్నట్టుగా. కానీ, పేద స్త్రీలకు, తలకుమించని భారాన్ని మోయాల్సి వాళ్ళకు - ఏదో ఒక రకంగా సంపాదించాలన్నదే ప్రధాన లక్ష్యంగా మారుతుంది. చేస్తున్న పని గౌరవప్రదమైనదా, కాదా అని ఆలోచించి ఎన్నిక చేసుకునే వెసులుబాటు ఎంత మాత్రమూ లభించదు.

ఉద్యోగాలు వెతుక్కుని, సంపాదించు కునే క్రమంలో కూడా ఎందరో స్త్రీలు శారీరకంగా దోపిడికి గురౌతూనే వున్నారు. అలాంట ిస్త్రీలు గౌరవ పాత్రులైన భార్యలుగా మిగలకపోవచ్చు.ఇక ఇళ్ళలో పనిమనుషులు చేస్తున్న చాకిరీకి గౌరవం దక్కుతోందని నాకు నమ్మకం లేదు. ఇంటిల్లిపాదివీ మురికి బట్టలుతికి, కుళ్ళు పనులన్నీ చేసినా యజమానులైన మగవాళ్ళకు ఏ మాత్రమూ గౌరవం ఉండదు.. అంతేకాదు ఎన్నో ఇళ్ళలోని మగవాళ్ళు పనిమనుషులుగా ఉన్న స్త్రీలను చేజిక్కించుకోటానికి కప్పను వేటాడే పాముల్లా కనిపెట్టుకుని ఉండి కాటు వెయ్యటమూ చూశాన్నేను.

ఈ విషయాలన్నీ ఉన్నత వర్గాల స్త్రీలకు తెలీనివికాకున్నా, తెలీనట్టే నటిస్తూ ఉంటారు. తమలాంటి గౌరవనీయమైన స్త్రీలకూ, మాలాంటి చవకరకం ఆడవాళ్ళకూ మధ్యనుండే సరిహద్దు రేఖనుండి వాళ్ళు ప్రయోజనం పొందుతూ ఉంటారు. ఆ సరిహద్దు నిజానికి చాలా బలహీనమైనదనీ, మగవాళ్ళ దృష్టిిలో ఏ స్త్రీలకూ సమాన హోదాలేదనీ మాకు తెలుసు.

ఇక మా వృత్తిలోని ప్రమాదాలనూ, హింసనూ గురించి చాలా మంది అడుగుతుంటారు. ప్రమాదాలు లేనిదెక్కడని నాప్రశ్న! చెట్టు మీద పండు ఉందనుకోండి. కొందరు దాన్ని నాజూగ్గా కోసుకుని తింటారు. మరికొందరు రాళ్ళతో రాలగొట్టి తింటారు. చివరికి రెండు రకాల వాళ్ళూ చేసేది ఆ పండును మింగటమేకదా! పెళ్ళిళ్ళ ద్వారా రక్షణ దొరుకుతుందన్నది కూడా ఉత్తి భ్రమగానే మిగులుతోంది. కాకపోతే క్లయింట్ల చేతుల్లో దెబ్బలు తినటాన్ని ‘హింస’గా గుర్తించగలిగిన వాళ్ళక్కూడా భర్తల చేతుల్లో దెబ్బలు తినటంలోని ‘హింస’అంత సులభంగా అర్ధం కాదు.

తల్లిగా మీ బాధ్యతలను నెరవేర్చటానికి మీరు చేసిన ప్రయత్నాలు చదువుతుంటే నిజంగా మనసు చలించిపోతుంది. సెక్స్‌వర్కర్ల జీవితాలను గురించి కొన్ని అపోహలున్నాయి. ఆ స్త్రీలనుండి ఇలాంటి విషయాలను గతంలో ఎవరూ విని వుండరు.

ఏ వ్యక్తినైనా ఒక్క కోణం నుంచి మాత్రమే చూడడం సరైందికాదని నా ఉద్దేశ్యం. రాజకీయాల్లోనూ, సినిమాల్లోనూ ఉన్న ఆడవాళ్ళకు పిల్లల సంరక్షణ గురించి పట్టించుకునేంత సమయం ఉండదని తరచుగా వింటుంటాం. అంటే కుటుంబ బాధ్యతలు చూసుకోవాల్సిన స్త్రీకి మరొక జీవితమంటూ ఉండకూడదన్న మాట. ఒక వ్యక్తి ఒకే పని చెయ్యగలరన్న మాటను నేను ఒప్పుకోను. అన్నమూ, కూరలూ వడ్డించుకున్న వాళ్ళు అన్నీ కలిపి తినటం లేదూ? ఇదీ అలాగే.

నేను చేస్తున్న ఈ పనులన్నీ కేవలం పేరు ప్రతిష్టలకోసమేనని భావించేవాళ్ళు ఉన్నారు. స్వప్రయోజనాల కోసం పాకులాడే ఏ వ్యక్తీ తన చుట్టుపక్కలవాళ్ళనూ, తనపై ఆధారపడిన వాళ్ళనూ పట్టించుకోడు. అనేక సమస్యలపై పనిచెయ్యాలనుకుంటున్న వాళ్ళు అలా వుండరు. ఇతరుల ప్రయోజనాల గురించి ఆలోచిస్తూ , పనిచేస్తూనే ఉంటారు.

ఇకమాతృత్వం గురించి -సెక్స్‌ వర్కర్లుగా ఉన్న వాళ్ళకు మాతృత్వ బావనలూ, బాధ్యతలూ ఉండవనుకోవటం పొరబాటు. నా చేతుల్లో పెరిగిన నా బిడ్డకు ఈ విషయం బాగా తెలుసు.చిన్నప్పుడే నాకు దూరమైన నా పెద్ద కూతురికి నా అవస్థల గురించి సరిగ్గా తెలిసే అవకాశం లేదు. పిల్లలను పెంచి పెద్ద చెయ్యటానికి మేము పడే బాధలను జనం ఎప్పుడూ అర్ధం చేసుకోరు. ఈ వృత్తిలో ఉన్నందుకు పట్టుబడి జైలు పాలయిన సెక్స్‌వర్కర్లు పిల్లలకు దూరమవుతారు. ఆ పిల్లలు ఇంకెవరి దగ్గరో పెరుగుతారు. ఈ స్త్రీలు జైలునుంచి బయటకొచ్చేసరికి పిల్లలెక్కడున్నారో, ఏమయ్యారో తెలీకుండా పోతుంది. ఇలాంటి సంఘటనల్లో ఆ స్త్రీలు పడే బాధ అర్ధం చేసుకోలేని మనుషులు, సెక్స్‌ వర్కర్లు పిల్లలను గాలికి వదిలేస్తారని తేలిగ్గా మాట్లాడేస్తారు పిల్లలకు దూరమైన స్త్రీలు నిస్సహాయతా, వేదనా ఎవరికీ అర్ధం కావు.

సెక్స్‌వర్కర్ల మీద క్లయింట్లు చెలాయించే ఆధిపత్యాన్ని ప్రతిఘటించడానికి మీ పుస్తకంలో ఒక అధ్యాయాన్నే కేటాయించారు. అలాంటి మగవాళ్ళను వెక్కిరించటంతో ప్రారంభించి తర్వాత తీవ్రు.మైన ఎదురుదాడికి దిగారు.

అవును సెక్స్‌వర్కర్‌తో క్లయింటు ప్రవర్తించే విధానం అణువణువునా అహంతో, ఆధిపత్యంతో నిండివుంటుంది. అసలు అతను ఆ స్త్రీ దగ్గరికి రాకముందు నించీ కూడా ఆమె మీద సహజమైన అధికారమేదో తనకు సంక్రమించినట్టుగా భావించు కుంటాడు. అతనితో కలిసివున్న ఆ కాసేపైన ఆ స్త్రీ ఏం చెయ్యాలో, ఏం చెయ్యకూడదో నిబంధనలు పెడతాడు. అతనిచ్చే డబ్బులు తీసుకోవడంద్వారా అన్ని విధాలుగానూ లొంగిపోవాలని ఆశిస్తాడు. నిజానికి నేనెప్పుడూ క్లయింట్లతో వివాదా లకు దిగను. మర్యాదగా, సున్నితంగా ప్రవర్తిస్తూ అతని కోరికల్లో నాకు ఇష్టంలేని వాటిని తిరస్కరించే అవకాశాన్ని ఏర్పరచుకుంటాను. దీనివల్ల ఆ వ్యక్తికి నా అభిప్రాయాల్ని మన్నించక తప్పని పరిస్థితి ఏర్పడుతుంది. తర్వాత క్రమంగా నిర్ణయాలు నా చేతిలోకి వస్తాయి. ఏ హోటలుకు వెళ్ళాలో, ఎలాంటి భోజనం కావాలో నేనే చెప్పగలుగుతాను.

క్లయింట్లు రమ్మన్న చోటికల్లా అనాలోచితంగా వెళ్లటం వల్ల స్త్రీలు చాలా ప్రమాదాల్లో పడతారు. హోటలు రూములకు తీసుకెళ్ళి స్త్రీలపై సామూహిక అత్యాచారా లకు పాల్పడ్డ ఉదంతాలు చాలా జరిగాయి. ఐతే, ఈ ప్రమాదాలను తప్పించుకోగలగటం కూడా అంత సులభమేమికాదు. ఎంతో జాగ్రత్తగా, దృఢంగా వ్యవహరించగలిగితే తప్ప ఈ వృత్తిలోకి స్త్రీలు తమను తాము కాపాడుకోలేరన్నది నిజం.

నేను మొట్ట మొదట కలుసుకున్నది ఓ పోలీసు అధికారిని. అతనే తర్వాత నన్ను అరెస్టు చెయ్యటానికి కారణమయ్యాడు. దాంతో నాకో విషయం అర్ధమయింది. ఏ క్లయింటూ సెక్స్‌వర్కర్‌నుంచి ఆత్మీయతను కోరుకోడు. వాళ్ళెప్పుడూ తమ అధికారాన్ని ప్రదర్శించుకునేందుకే చూస్తారు. అప్పట్నించీ వాళ్ళ అధిపత్యాన్ని ఇష్టమొచ్చినట్టుగా చెలాయించనివ్వకుండా జాగ్రత్త పడసాగాను.
మీ రచన ముగింపు అధ్యాయాన్ని తగినంత బలంగా రూపొందించలేక పోయారని చాలామంది పాఠకులు భావిస్తున్నారు. నాకూ అలానే అన్పిస్తోంది.

నిజమే, ఒప్పుకుంటున్నాను. ఈ భాగాన్ని చాలా హడావుడిగా రాశాను. మొదటి ప్రచురణ సమయంలో జరిగిన ఇబ్బందులవల్ల ఈ సారి త్వరగా ముగించా లన్న ఆత్రుతతో రచన ఎలా వస్తోందో గమనించుకోలేకపోయాను. మరోసారి ఈ రచనను తిరగరాసే అవకాశం వచ్చిందంటే నా తోటి స్త్రీలకు కొన్ని విషయాలు చెప్పాలనుకుంటున్నాను. ప్రజా జీవితంతో, సమస్యలతో సంబంధాలు ఏర్పరచుకోమనీ, సమాజాభివృద్ధికి పనికొచ్చే రంగాల్లో పనిచెయ్యమనీ చెప్పాలన్నది నా ఆశ. ఎంతోమంది అమాయకమైన ఆడపిల్లలు సెక్స్‌రాకెట్‌ వలలో పడి ధ్వంసమై పోతున్నారు. అలాంటి అమ్మాయి లకు ఆత్మరక్షణకోసం కొన్ని సూచనలు ఇవ్వాలని వుంది.

మీరిలా ఆత్మకథను రాసుకోవటమనేది నిజంగా ఓ సాహసం. ఇందుకు ప్రేరణనిచ్చిందేమిటో చెప్తారా?

నేనిలా పుస్తకం రాయాలనుకుంటు న్నానని తెలిసినప్పుడే చాలామంది గగ్గోలు పెట్టారు. మొదటి ప్రచురణ వచ్చాక, అదంతా నిజంకాదనీ, ఉత్తి కట్టుకథలు చెప్పాననీ వ్యాఖ్యానించారు. అసలు ఈ పుస్తకం రాసిన వ్యక్తి నిజంగా ఉందా అనే చర్చ కూడ మొదలయింది. తర్వాత నేను పుస్తకాన్ని తిరిగి రాస్తున్నానని తెలిసి మరో గొడవ ప్రారంభమయింది. నన్ను అడ్డుపెట్టుకుని వేరే వాళ్ళెవరో నా పేరిట ఇదంతా రాశారనీ, ఇదొక స్త్రీ ఆత్మకధ కావటంతో ‘ఫెమినిస్టు’లు దాన్ని ప్రచారం లోకి తెచ్చారనీ- ఇలా రకరకాల కధనాలు.

ఇవన్నీ విన్నాక పుస్తకాన్ని తిరగరాసి తీరాలనీ, అందుకునా స్నేహితుల సాయం తీసుకోవాలనీ నిర్ణయించుకున్నాను. నా మిత్రుల్లో కొందరు ఫెమినిస్టులు కూడా ఉన్నారు. నాకు సాయపడిన స్నేహితుల్లో ఎన్‌.బైజూ, షాజూ వి,వి, షమీనా, పి.వి.రేష్మా భరద్వాజ్‌, ఎస్‌.సంజీవ్‌, దిలీప్‌రాజ్‌ - వీళ్లంతా ముఖ్యులు. వాళ్ళు నాకు రాత పనిలో సాయం చేస్తామని ముందుకొచ్చారే తప్ప, ఏం రాయాలో నిర్ణయించే పద్ధతిలో ఎప్పుడూ ప్రవర్తించలేదు. నాకన్నా బాగా తెలిసిన వాళ్ళమూ, మేధావులమూ అన్న ఆధికత్యాభావం వాళ్ళలో ఏ కోశానా లేదు. చదువురానిదాన్నన్న ఆత్మన్యూనత నాలోనూ కలగలేదు. నా మనసులో భావాలను నాకు చేతనైన పద్ధతిలో వ్యక్తం చేశాను. వాళ్ళందరూ కలిసి నా జ్ఞాపకాలనూ, అను భవాలనూ అడిగి తెలుసుకుంటూ పుస్తకం రాయటానికి తోడ్పాటు నందించారు.

ఐతే మొదటి ప్రచురణ సమయంలో ఇలాంటి వాతావరణం నాకు దొరకలేదు. రాత పనిలో సాయంచేసిన వ్యక్తి ఇతరులెవ్వరి జోక్యాన్ని అనుమతించలేదు. అతను రాస్తున్న పద్ధతి నాకు నచ్చక ఎక్కడన్నా సవరించ బోయినా అతను అంగీకరించలేదు. ఆత్మకథా రచనకు కొన్ని పద్ధతులుంటాయని వాటిని పాటించి తీరాలనీ చెప్పేవాడు.

ఈ పుస్తకాన్ని ఇప్పుడున్న రూపంలో రాయాటానికీ, పాఠకులముందుకు తీసుకురావటానికీ నేనెంత శ్రమపడాల్సి వచ్చింది. నా అభిప్రాయాన్ని గౌరవించి పనిపూర్తయ్యేదాకా నాకు తోడుగా నిలిచిన మిత్రులందరికీ కృతజ్ఞురాలిని. నా ఆత్మకథ రెండో బాగాన్ని కూడా రాసి తీరుతాను. నా జీవితం కొనసాగినంత కాలమూ, నా అనుభవాలు ఇతరులకు ఉపయోగకరంగా తోచినంతకాలమూ పాఠకులు నా రచనలను ఆదరిస్తారు. అందుకే నా కథను మీకు ఇలా విన్పిస్తూనే వుండాలని నా కోరిక.



ఒక సెక్స్‌ వర్కర్‌ ఆత్మకథ-
నళినీ జమీలా
వెల : రూ. 50 –
ప్రచురణ: హెద్రాబాద్‌ బుక్‌ట్రస్ట్‌

వివరాలకు: హెచ్‌బిటి, ఫ్లాట్‌నెం. 85, బాలాజీనగర్‌, గుడిమల్కాపూర్‌
హైద్రాబాద్‌- 500067
(ఫోన్‌ 23521849)

పుస్తక ప్రేమికులకు శుభవార్త

ఎ వి కే ఫౌండేషన్ వారి ద్వారా హెచ్ బి టి పుస్తకాలు సులువుగా పొందవచ్చు

విదేశాలలో వున్నవారు హైదరాబాద్ బుక్ ట్రస్ట్ పుస్తకాలను ఇకనుంచి ఎ వి కే ఫౌండేషన్ వారి ద్వారా సులువుగా సరసమైన ధరలకే పొందవచు. ప్రస్తుతం వారి వద్ద హెచ్ బి టి ప్రచురించిన ౬౦ కి పైగా పుస్తకాలు లభిస్తున్నాయి. త్వరలో మేము ప్రచురించిన అన్ని పుస్తకాలను వారి ద్వారా అందించేందుకు ఏర్పాటు చేస్తున్నాము.
ఎ వి కే ఫౌండేషన్ వారి వెబ్ సైట్ చిరునామా:
http://www.avkf.org/

పంచమం పుస్తక ఆవిష్కరణ సభ అందరూ ఆహ్వానితులే

పంచమం పుస్తక ఆవిష్కరణ సభ
24 జనవరి 2009 శనివారం సాయంత్రం 5.30 కి
హైదరాబాద్ ప్రెస్ క్లబ్ బషీర్ బాగ్ లో

పంచమం ... ఉద్యమాల నేపథ్యంలో తొలి దళిత నవల ... చిలుకూరి దేవపుత్ర .. పుస్తకావిష్కరణ .. జనవరి 24న హైదరాబాద్‌ ప్రెస్‌క్లబ్‌లో ....

హైదరాబాద్‌ బుక్‌ ట్రస్ట్‌ మరియు సెంటర్‌ పర్‌ రూరల్‌ స్టడీస్‌ అండ్‌ డెవలప్‌మెంట్‌ వారు

పంచమం
చిలుకూరి దేవపుత్ర రచించిన తొలి దళిత నవల

పుస్తకావిష్కరణ సభకు

మిమ్మల్ని సాదరంగా ఆహ్వానిస్తున్నారు.

వేదిక:
ప్రెస్‌ క్లబ్‌, బషీర్‌ బాగ్‌

తేది, సమయం:
24 జనవరి 2009 శనివారం సాయంత్రం 5.30

వక్తలు:
- ప్రొ. కొలకలూరి ఇనాక్‌
మాజీ వైస్‌ ఛాన్స్‌లర్‌, శ్రీ వెంకటేవ్వర విశ్వవిద్యాలయం

- వోల్గా
స్త్రీవాద రచయిత్రి

- విద్యాసాగర్‌
సాంఘిక సంక్షేమ శాఖ కమిషనర్‌

- ఎన్‌. వేణుగోపాల్‌
సంపాదకుడు, వీక్షణం

- బోస్‌
సెంటర్‌ ఫర్‌ రూరల్‌ స్టడీస్‌ అండ్‌ డెవలప్‌మెంట్‌